Որքա՞ն մեծ է Հարավային Կովկասում անվտանգության խաթարման հավանականությունը
Միջազգային հարցերով փորձագետ Անդրանիկ Հովհաննիսյանը գրել է․
«Իրանի Գերագույն առաջնորդի միջազգային հարցերով ավագ խորհրդական Ալի Աքբար Վելայաթիի խոսքով՝ Իրանի և Ռուսաստանի Դաշնության ղեկավարությունները պետք է մեծ ուշադրություն դարձնեն այն ամենին, ինչ կատարվում է Հարավային Կովկասում։
«Ուկրաինական պատերազմի վրա կենտրոնացումը հանգեցրել է Կովկասյան տարածաշրջանի որոշակի անտեսմանը: Հիմա ԵՄ երկրները, ԱՄՆ-ն ու Իսրայելը միջամտում են տարածաշրջանի իրադարձություններին։ Եթե այս միտումը շարունակվի, վտանգ կլինի ողջ տարածաշրջանի անվտանգությանը։ Կովկասի խնդիրների ցանկացած անտեսում և չափից ավելի պարզեցում կհանգեցնի նրան, որ Իրանի և Ռուսաստանի հակառակորդները չեն սահմանափակի իրենց մտադրությունները հարավկովկասյան տարածաշրջանով, այլև կտարածեն իրենց ազդեցությունը Հյուսիսային Կովկասի և Կասպից ծովը շրջակա երկրների, այդ թվում՝ Կենտրոնական Ասիայի պետությունների վրա։ Սա պետք է կարմիր գիծ դառնա Իրանի և Ռուսաստանի համար»։
Իրականում, Իրանի Գերագույն առաջնորդի միջազգային հարցերով ավագ խորհրդական Ալի Աքբար Վելայաթին խոսում է այն սպառնալիքների մասին, որոնց մասին ես և իմ որոշ գործընկերներ զգուշացնում ենք արդեն ավելի քան երեք տարի՝ Հարավային Կովկասում աշխարհաքաղաքական իրավիճակի շոշափելի փոփոխությունից հետո, որը 2020 թվականի պատերազմի և թուրք-ադրբեջանական տանդեմի կողմից Արցախի զգալի մասը բռնազավթման արդյունքն է»։
