Սուրբ Գևորգ եկեղեցու տարածքում արձանագրել են չհամաձայնեցված գործողության դեպք
Պատմական միջավայրի պահպանության Գեղարքունիքի մարզային ծառայության աշխատակիցները Գեղարքունիք գյուղի Սբ Գևորգ եկեղեցու տարածքում արձանագրել են չհամաձայնեցված գործողության դեպք։
Գյուղի բնակիչները հուշարձանի տարածքում խաչքար տեղադրելու համար դիմել են ՀՀ ԿԳՄՍ նախարարություն և «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ թույլտվություն ստանալու համար։
«Պահպանության ծառայություն» ՊՈԱԿ-ից հայտնում են, որ համաձայն՝ ՀՀ Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին ՀՀ օրենքի 16-րդ հոդվածի հուշարձանի տարածքում չի թույլատրվել տեղադրել խաչքար։ Առաջարկվել է խաչքարը տեղադրել հուշարձանի պահպանական գոտու տարածքից դուրս, սակայն բնակիչները գիշերը պահպանական գոտու տարածքում իրականացրել են խաչքարի հիմքի նախապատրաստում։
