Դատախազների աշխատավարձերի բարձրացում 92 տոկոսով․ ընդդիմադիր պատգամավորը որոշումը հապճեպ և անհիմն է համարում
Կառավարությունն առաջարկում է դատախազների աշխատավարձերը բարձրացնել 92 տոկոսով։ Այս մասին այսօր՝ փետրվարի 28-ին, Ազգային ժողովի նիստում «Պետական պաշտոններ զբաղեցնող անձանց, ինչպես նաև պետական ծառայողների վարձատրության մասին» օրենքում փոփոխություններ և լրացումներ կատարելու մասին օրինագծի քննարկման ժամանակ հայտարարեց արդարադատության փոխնախարար Լևոն Բադալյանը։
Փոխնախարարի խոսքով՝ դատախազների ծանրաբեռնվածությունը վերջին տարիներին զգալիորեն աճել է։ Դա, ինչպես նշեց Բադալյանը, լրջորեն նվազեցնում է վերահսկիչ մարմնում ծառայության գրավչությունը։ Երիտասարդ իրավաբանները 3-4 տարի դատախազությունում աշխատելուց հետո, որպես կանոն, անցնում են փաստաբանություն, որտեղ աշխատանքը շատ ավելի քիչ է, իսկ փողը՝ ավելի շատ։
Հայաստանում այսօր աշխատում է շուրջ 430 դատախազ։ «Աշխատավարձերի բարձրացման համար նրանց համար կհատկացվի 2 մլրդ 443 մլն դրամ»,-տեղեկացրեց կառավարության ներկայացուցիչը:
Այսօրվա դրությամբ հանրապետությունում կրտսեր և միջին օղակի դատախազների միջին աշխատավարձը կազմում է մոտ 400-460 հազար դրամ։ Այսինքն՝ հանած հարկերը՝ մոտ 295-350 հազար դրամ։
«Հայաստան» խմբակցության պատգամավոր Թադևոս Ավետիսյանը որոշումը հապճեպ և անհիմն համարեց: Նրա կարծիքով՝ իշխանություններն այդպիսով փորձում են ստանալ իրավապահ դաշինքի աջակցությունը՝ իրենց դիրքերի հետագա ամրապնդման համար։ «Դուք ինչ-որ ստանդարտ հիմնավորումներ ու փաստարկներ եք բերում։ Ասում են՝ նրանց ծանրաբեռնվածությունը մեծ է։ Սակայն այս նույն փաստարկները մի շարք այլ ոլորտների համար հնչում են շատ ավելի ծանրակշիռ և հիմնավորված։ Օրինակ, երբ խոսքը վերաբերում է բանակում ծառայելուն»,-ասաց Ավետիսյանը։
Շարքային դատախազների աշխատավարձերի նման էական բարձրացումը, ինչպես նշեց պատգամավորը, փաստորեն հավասարեցնելու է նրանց նախարարների ու խորհրդարանական հանձնաժողովների ղեկավարների հետ։
