Աշխարհը միջուկային պատերազմի շեմին. 5
Սկիզբը` այստեղ
ՌԴ արտգործնախարարությունը երեկ հայտարարել է, որ ԱՄՆ-ը վտանգավոր հավասարակշռվում է միջուկային հակամարտության շեմին: Այո, ԱՄՆ-ը հարբած կամ անվարժ լարախաղացի նման վտանգավոր կերպով հավասարակշռվում է միջուկային հակամարտության շեմին, և Ուկրաինայի առիթով իրադարձությունների զարգացմանը հետևող ու բավականաչափ տեղյակ ցանկացած մեկը դժվար թե չհամաձայնի այս եզրահանգման հետ:
Ռուսաստանի հետ Ուկրաինայի պատճառով հիբրիդային դիմակայություն սանձազերծելով (իրականում ոչ թե սոսկ դիմակայություն, այլ հիբրիդային պատերազմ.- Ա.Հ.), Միացյալ Նահանգները և նրա դաշնակիցները վտանգավոր հավասարակշռվում են միջուկային տերությունների բախման եզրին, և դրա համար պատասխանատվությունը Մոսկվայի վրա դնելու փորձերը բացարձակապես անընդունելի են: Այս մասին, «РИА Новости»-ի տեղեկացմամբ, հուլիսի 12-ին հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան։
«Սադրելով ուկրաինական ճգնաժամի սրումը և Ռուսաստանի հետ կատաղի հիբրիդային դիմակայություն սանձազերծելով, Վաշինգտոնը և նրա դաշնակիցները վտանգավոր կերպով հավասարակշռվում են մեր երկրի հետ բաց ռազմական առճակատման շեմին, ինչը նշանակում է միջուկային տերությունների ուղղակի զինված հակամարտություն,- ասել է Զախարովան մեկնաբանության մեջ։- Ակնհայտ է, որ նման բախումը հղի կլինի միջուկային էսկալացիայով»:
Ինչպես երեկ տեղեկացրեց «РИА Новости» -ին, Նյու Յորքի իշխանությունները հրապարակել են ուղեցույց, որին պետք է հետևի բնակչությունը միջուկային հարվածի դեպքում : Նյու Յորքի արտակարգ իրավիճակների դեպարտամենտը տեսահոլովակ է հրապարակել, որում նյույորքցիներին խորհուրդ է տրվում պատսպարվել տանը և փակել պատուհաններն ու դռները քաղաքի վրա միջուկային հարձակման դեպքում: Տեսանյութի հեղինակները խնդրում են չհարցնել, թե ինչու և ինչպես դա կարող է տեղի ունենալ:
«Այսօր Նյու Յորք քաղաքի արտակարգ իրավիճակների դեպարտամենտը նոր հայտարարություն է թողարկել` որում հիմնական ուշադրությունը հատկացված է միջուկային միջադեպին պատրաստվածությանը,- հաղորդում է դեպարտամենտի կայքը:- Թեև Նյու Յորքում կամ շրջակայքում միջուկային զենքով միջադեպի հավանականությունը շատ ցածր է, կարևոր է, որ Նյու Յորքի բնակիչներն իմանան ինչպես պետք է մնան անվտանգության մեջ:
Տեսանյութում մոդելավորված է իրավիճակ, որում «Մեծ խնձորին հարված է հասցված»: Ինձ չհարցնեք, թե ինչու կամ ինչպես»,- ասում է սև կոստյումով կինը։
Կինը խնդրում է Նյու Յորքի բնակիչներին հիշել երեք կարևոր քայլ. «Արագ թաքնվեք շենքի ներսում», – ասում է նա: Ընդ որում, անհրաժեշտ է պատուհաններից հեռու գնալ: «Մեքենայում նստելը տարբերակ չէ»,- ասում է կինը։- Մնացեք ներսում, փակեք բոլոր դռներն ու պատուհանները, եթե նկուղ կա, թաքնվեք այնտեղ»։
«Եթե դուք փողոցում եք եղել պայթյունից հետո, անհրաժեշտ է անհապաղ մաքրվել»,- ասում է կինը երկրորդ քայլի մասին: Նրա խոսքով` պետք է հանել ամբողջ հագուստը և փաթաթել այն պոլիէթիլենով, որպեսզի «ռադիոակտիվ փոշին հեռու պահվի… մարմնից»:
«Քայլ երրորդ. սպասեք թարմացումներին, ԶԼՄ-ների հաղորդագրություններին: Դուրս մի՛ եկեք, քանի դեռ պաշտոնատար անձինք չեն ասել, որ դա անվտանգ է»,- նշել է նա։
Բնականաբար, հարց է առաջանում` ի՞նչ նպատակ ունի վերոնշյալ ուղեցույցի հրապարակումը, եթե ԱՄՆ ռազմաքաղաքական ղեկավարության միտքը, մեղմ ասած, ծուռ չէ, իսկ ավելի որոշակի` եթե նպատակ չունի Ռուսաստանի հետ գլոբալ հակամարտության ընթացքում ու ներկայիս հիբրիդային պատերազմում տանուլ տալու դեպքում ուղղակի ռազմական բախում սադրելու Արևմուտքի և ՌԴ-ի միջև:
Բելառուսի նախագահ Ալեքսանդր Լուկաշենկոն, «Ведомости»-ի տեղեկացմամբ, ՌԴ նախագահ Վլադիմիր Պուտինին պատմել է Ռուսաստանի վրա հարձակվելու Արևմուտքի պլանների մասին: Արևմուտքը Ռուսաստանի վրա հարձակման ռազմավարական ծրագրեր է մշակում, հարվածի ուղղությունները հայտնի են, հայտարարել է Լուկաշենկոն։ Նրա խոսքով՝ այս թեման քննարկվել է ՌԴ նախագահ Վլադիմիր Պուտինի հետ հեռախոսազրույցների ժամանակ։
«Եվ մենք երեկ մանրամասն քննարկել ենք դա Ռուսաստանի Դաշնության նախագահի հետ»,- ասել է Լուկաշենկոն (մեջբերում է ԲԵԼՏԱ-ն):- Իսկ հարվածի հիմնական ուղղությունը (պատմությունը կրկնվում է) Ուկրաինայի վրայով է և Բելառուսի վրայով»:
Նախօրեին Պուտինը և Լուկաշենկոն հեռախոսազրույց են ունեցել, որի ընթացքում քննարկել են Ուկրաինայում ռուսական զորքերի հատուկ գործողության ընթացքը, տարանցումը Կալինինգրադի մարզ, իրավիճակը հետխորհրդային տարածքում, ռուսական էներգակիրների մատակարարումը Եվրոպա, ինչպես նաև բելառուսական նավահանգստի կառուցումը։
Հուլիսի 6-ին Բելառուսի զինված ուժերի գլխավոր շտաբի պետի տեղակալ Ռուսլան Կոսիգինը հայտարարել է, որ ԱՄՆ-ն և ԵՄ-ն պատրաստվում են զինված բախման Ռուսաստանի և Բելառուսի հետ, քանի որ «հիբրիդային ագրեսիան արդյունք չի տալիս»։ Նրա խոսքով` հակամարտության դեպքում Լեհաստանի տարածքն իր ռազմական ենթակառուցվածքով կդառնա հարվածի առաջնային թիրախ, այն է՝ որոշումների կայացման կենտրոնները, կառավարման համակարգի տարրերը, զինված ուժերի մշտական տեղակայման կետերը, սպառազինությունը և բազաները, ինչպես նաև նրանց տնտեսության և տրանսպորտային ենթակառուցվածքների կարևորագույն օբյեկտները։
Բելառուսի զինված ուժերի գլխավոր շտաբի պետն այսպիսով ակնարկել է, որ ԱՄՆ-ն և ԵՄ-ն մտադիր են Ռուսաստանի և Բելառուսի հետ զինված բախումը սադրել Լեհաստանի միջոցով: Հավելենք, որ Լեհաստանը ՆԱՏՕ-ի անդամ է:
Ինչպես այսօր տեղեկացրեց «РИА Новости» -ին, Մոսկվան Արևմուտքի հետ հարաբերություններում պատրաստ է իրադարձությունների ցանկացած զարգացման, թեև ամեն կերպ փորձում է խուսափել վատագույնից և ափսոսում է, որ մյուս կողմն առայժմ ցուցաբերում է դիմակայության ծավալման տրամադրվածություն: Այս մասին «РИА Новости»-ին տված հարցազրույցում հայտարարել է ՌԴ արտաքին գործերի նախարարության տնտեսական համագործակցության դեպարտամենտի տնօրեն Դմիտրի Բիրիչևսկին։
«Մենք պատրաստ ենք իրադարձությունների ցանկացած զարգացման, դիտարկում ենք բոլոր հնարավոր տարբերակները, թեև ամեն կերպ փորձում ենք խուսափել վատագույնից,- ասել է Բիրիչևսկին։- Ցավոք, մեր արևմտյան գործընկերները մինչ այժմ միանշանակ ցույց են տալիս, որ տրամադրված են Ռուսաստանի հետ դիմակայության ծավալմանը»:
Հիշյալ դեպարտամենտի տնօրենն ավելի վաղ անդրադառնալով Արևմուտքի կողմից Ռուսաստանի դեմ վարվող հիբրիդային պատերազմի բաղադրիչ տնտեսական պատերազմին, նշել էր, որ Մոսկվան Արևմուտքի հետ հարաբերություններում դեռ «ամբողջ ուժով» հակամիջոցներ չի կիրառել` ի պատասխան պատժամիջոցների։
Շարունակելի
Արթուր Հովհաննիսյան
