ԱՄՆ ՀԴԲ տնօրենը հայտարարել է, որ կիբերանվտանգության հիմնական սպառնալիքները Չինաստանից են
Չինաստանի կիբերանվտանգության սպառնալիքների ներկայիս մասշտաբները «աննախադեպ են», ասել է ԱՄՆ հետաքննությունների դաշնային բյուրոյի տնօրեն Քրիստոֆեր Ռեյը։
«Հակահետախուզության տվյալներով՝ մեր երկիրն ամենամեծ սպառնալիքն ստանում է Չինաստանի Ժողովրդական Հանրապետությունից և հատկապես Չինաստանի Կոմունիստական կուսակցությունից», – ասել է Ռեյը CBS News-ին տված հարցազրույցում։ Գրում է «Ինտերֆաքս»-ը:
«Նրանք պատմության մեջ աննախադեպ մասշտաբով թիրախավորում են մեր նորարարությունը, մեր առևտրային գաղտնիքները, մեր մտավոր սեփականությունը»,- նշել է նա:
Նրա խոսքով, Չինաստանի հաքերային ծրագիրն ավելի մեծ է, քան մյուս խոշոր երկրների ծրագրերը միասին վերցրած:
«Նրանք գողացել են ավելի շատ ամերիկացիների անձնական և կորպորատիվ տվյալներ, քան բոլոր երկրները միասին վերցրած»,- ասել է Ռեյը։
Միաժամանակ նա ընդգծել է, որ Պեկինի կիբերսպառնալիքներն ուղղված են ԱՄՆ տնտեսության բոլոր ոլորտներին՝ գյուղատնտեսությունից մինչև ավիացիա, բարձր տեխնոլոգիաներից մինչև առողջապահություն։
