Գյումրիում մինչև -30 աստիճան ցուրտ է սպասվում․ անապահով ընտանիքների համար պետք է բացառություն արվի
Շիրակի մարզում հիմա էլ շարունակվում է նախորդ օրվանից սկսած ցուրտ քամիներն ու բուքը։ Այս մասին գրել է «Շիրակ կենտրոն» ՀԿ նախագահ Վահան Թումասյանը «Շատ կացարաններում վառարանների ծուխը քամին լցնում է ներս և պարտադրված շատ ընտանիքներ նստած են պաղ վառարանի կողքին։
Ջերմաստիճանը վաղվանից ևս նվազելու է, Գյումրիում մինչև -30 աստիճան ցուրտ է սպասվում, բնականաբար մարզի լեռնային գյուղերում առնվազն 8-10 աստիճանով առավել ցածր կլինի։
Դոմիկներում, կիսաքանդ շինություններում պատսպարված ընտանիքներին անգամ վառելիքով թեթև աջակցություն կամ գոնե մի դատարկ զգուշացում չի արվել։ Անկեղծ ասած, գլուխ չեմ հանում, թե անցած օրերին էլ մի շարք մամուլի միջոցներ ինչից ելնելով էին գրել, թե եղանակը առաջիկա օրերին 9-10 աստիճանով տաքանալու է։ Ինչպես կասեր նման դեպքերում հասարակ գյումրեցին՝ լրիվ են գժվել։
Հա, մի բան էլ, սոցիալապես ծայրահեղ ծանր պայմաններում գոյատևող ընտանիքների համար բացառություն պետք է արվի և հունվարի համար կոմունալ վճարները չմուծելու համար, լույսից ու գազից, առնվազն մեկ երկու ամիս ժամանակով՝ չզրկվեն, մի անգամ էլ՝ թող մի քիչ մարդ լինեն»,- գրել է նա։
