Իրանը կրկին ապտակել է Ամերիկային և նախապայմաններ առաջ է քաշել
ՀՀ քաղաքացիներին արդեն տեղեկացրել ենք, որ նոյեմբերի 7-ից Իրանի հարավում՝ Հորմոզգան, Սիստան և Բելուջիստան նահանգներում, Մաքրանի ափին և Հնդկական օվկիանոսի հյուսիսային հատվածում, իրանական բանակը լայնածավալ զորավարժություններ են անցկացնում «Զոլֆաքար 1400» ծածկանունով՝ Իրանի ռազմածովային ուժերի, հակաօդային պաշտպանության, ռազմաօդային ուժերի և ցամաքային զորքերի ստորաբաժանումների մասնակցությամբ։ Ավելի վաղ հայտնել էինք նոյեմբերի 3-ին Օմանի ծովում ԱՄՆ-ի դեմ Իրանի Իսլամական հեղափոխության պահապանների կորպուսի հաջող հատուկ գործողության մասին։ Իսկ հիմա՝ նոր ուղերձ, որով Իրանը շարունակում է հանդգնորեն նվաստացնել ամերիկացի զինվորականներին։
Իրանը որսացել է ամերիկյան անօդաչու թռչող սարքեր, նոյեմբերի 9-ին հայտնել է իրանական «Միհր նյուզ»-ը։ Միջադեպը տեղի է ունեցել հենց իրանական Zolfagar 1400 զորավարժությունների ժամանակ, որի ժամանակ ամերիկյան MQ-9 և RQ4 անօդաչու թռչող սարքերը մտել են Իրանի ՀՕՊ նույնականացման գոտի։ Ամերիկյան անօդաչու թռչող սարքերը փոխել են իրենց ուղղությունը միայն այն բանից հետո, երբ դրանք կալանավորվել և զգուշացվել են Իրանի հակաօդային պաշտպանության կողմից։ ԱՄՆ-ը հետևել է իրանական զորավարժություններին հենց սկզբից։ Զորավարժությունների առաջադրանքները ներառում են Իրանի օդային տարածքի և երկրի հարավային մասի ընդհանուր զորավարժությունների մշտադիտարկումը, ինչպես նաև հակառակորդի թիրախների դեմ պայքարը։ Ինչպես հաղորդում են իրանական բոլոր լրատվամիջոցները, այս զորավարժությունների ընթացքում հաջողությամբ փորձարկվել է իրանական նոր հարվածային անօդաչու թռչող սարքը։
Ամերիկյան կողմը հերթական անգամ լռում է, ԱՄՆ Պենտագոնը ոչ մի կերպ չի արձագանքում Իրանի հաղորդագրություններին: Եվ, ինչպես կարծում ենք, բացարձակապես պատահական չէ, որ Իրանի կողմից վերջին օրերին ամերիկացիներին հասցրած միջազգային այդ «ապտակների» ֆոնին պաշտոնական Թեհրանը որոշակի նախապայմաններ է առաջադրել Վաշինգտոնին, որոնց կատարումից հետո միայն իրանցիները ԱՄՆ-ին թույլ կտան վերադառնալ 2015 թվականի «միջուկային համաձայնագրի» շրջանակին: Իրանի արտգործնախարարության խոսնակ Սեյյեդ Սաիդ Խաթիբզոդան ասել է, որ Միացյալ Նահանգները կկարողանա վերադառնալ միջուկային գործարքին միայն այն դեպքում, եթե Թեհրանի նկատմամբ տնտեսական պատժամիջոցները չեղարկվեն, համաձայնագրի փլուզման համար մեղավոր ճանաչվի, ինչպես նաև հավաստիացնի Թեհրանին, որ ԱՄՆ-ի դուրս գալը JCPOA-ից այլևս չի կրկնվի: «ԱՄՆ-ը պետք է իմանա, որ ինքը JCPOA-ի անդամ չէ և չի կարող որևէ բան խնդրել այս համաձայնագրով գործարքի մյուս անդամներից։ ԱՄՆ-ի՝ JCPOA-ին վերադառնալու ճանապարհը պարզ է: Նա պետք է ընդունի իր մեղքը, իսկ ստեղծված իրավիճակում պետք է միանգամից հանի պատժամիջոցները։ Մենք պետք է վստահ լինենք, որ ապագայում ոչ մի այլ վարչակազմ չի կրկնի Թրամփին՝ դուրս գալով Իրանի հետ միջուկային համաձայնագրից»,- ասել է Խաթիբզոդան նոյեմբերի 8-ին Թեհրանում կայացած ճեպազրույցում։
Իսկ նոյեմբերի 9-ին, ինչպես հաղորդում է IRNA-ն, Իրանի դատական համակարգի խոսնակ Զավիոլլահ Խոդաիանը հայտնել է, որ «Ալ-Ահվազիա» ահաբեկչական խմբավորման առաջնորդը դատապարտվել է 324 գործով՝ կապված ԱՄՆ կառավարության դեմ դատական հայցերի հետ։ «Ցավոք, ԱՄՆ կառավարության և նրա չար կառավարիչների դաժան գործողությունների հետևանքով Իրանի քաղաքացիներն ու ընդհանրապես իրանցիները հսկայական հոգևոր և նյութական կորուստներ են կրել,- ասել է նա։ – Ամերիկացիներն իրենց գործողություններով մեծ վնաս են հասցրել մեր ժողովրդին, այն միջադեպերի ժամանակ, ինչպիսիք են Թաբասի հարձակումը, հեղաշրջմանն աջակցելը, Իրանի ժողովրդի դեմ ահաբեկչական և զինված հարձակումներին աջակցելը, Իրաքի Բաասի ռեժիմին քիմիական զենքով զինելը և տասնյակ այլ հանցագործություններ։ Մինչ այժմ Թեհրանի գլխավոր դատարանում ԱՄՆ կառավարության դեմ 324 գործ է կայացվել, և այդ գործերով ԱՄՆ կառավարության դեմ ողջ գումարը կազմում է ավելի քան 2 հազար միլիարդ թուման»։
Ինչպես տեսնում ենք, Զ. Խոդաիանը Վաշինգտոնին ըստ էության առաջ է քաշել ևս մեկ նախապայման՝ ընդունել մեղքը «Ալ-Ահվազիա» խմբավորման ահաբեկիչների կողմից իրականացված ահաբեկչությունների համար։ «Կենացները քաղցրանում են»՝ ինչպես մեր ժողովուրդն է ասում։
Սերգեյ Շաքարյանց
