Հունաստանում տուրիստական սեզոնը կսկսվի հունիսի 15-ից, դեպի հանգստավայրեր միջազգային թռիչքները կվերսկսվեն հուլիսի 1-ից
Չորեքշաբթի Հունաստանի վարչապետ Կիրիակոս Միցոտակիսը հայտարարել է, որ երկրում տուրիստական սեզոնը կսկսվի հունիսի 15-ին: Այս մասին հայտնում է Associated Press-ը:
Նա նշել է, որ հուլիսի 1-ից նախատեսվում է աստիճանաբար վերսկսել միջազգային թռիչքները դեպի հունական հանգստավայրեր:
Վարչապետը նշել է, որ Հունաստանին «հաջողվել է կանխել վիրուսի տարածումը, և մեր երկիրը դարձել է առողջապահական ոլորտում ճգնաժամի կարգավորման օրինակ»:
Միևնույն ժամանակ, նա ավելացրել է, որ օտարերկրյա զբոսաշրջիկները երկիր մուտք գործելու դեպքում թեստավորվելու են կորոնավիրուսային վարակի համար:
Հունական կառավարությունը երկրում սահմանափակող միջոցառումներ իրականացրեց կորոնավիրուսների բռնկման վաղ փուլերում, ինչը հանգեցրեց նրան, որ Հունաստանում կորոնավիրուսային հիվանդությունների թիվը շատ ավելի ցածր է, քան եվրոպական այլ երկրներում, նշում է գործակալությունը:
Անցած օրը երկրում գրանցվել է վարակի միայն տասը նոր դեպք, մեկ մարդ մահացել է:
Հունաստանում արդեն իսկ բացվել են բազմաթիվ տուրիստական տեսարժան վայրեր, ավելի քան 200 հնագիտական հուշարձաններ, մասնավորապես, Աթենքի Ակրոպոլիսն արդեն վերսկսել է աշխատանքը:
