Մարինա Խաչատրյանը ձվեր դրեց փոխոստիկանապետի սեղանին (տեսանյութ)

Բաց հասարակության հիմնադրամի կողմից կազմակերպված «Հետհեղափոխական Հայաստան. ոստիկանության բարեփոխումների տեսլականը և օրակարգը» քննարկմանը միջադեպ տեղի ունեցավ։ Միջոցառմանը ներկա ակտիվիստ, «Առողջ Հանրություն» ՀԿ նախագահ Մարինա Խաչատրյանը տեղից վեր կացավ և դիմելով միջոցառման բանախոսներից փոխոստիկանապետ Հովհաննես Քոչարյանին, մեղադրանքներ հնչեցրեց ոստիկանության հասցեին։

News.am-ի տեղեկացմամբ, Խաչատրյանը հայտարարեց, որ իրականությանը չի համապատասխանում այն պնդումը, թե ոստիկանության նկատմամբ վստահությունը բարձրացել է։

«Պատճառները մի քանիսն են. տեղի ունեցավ հարձակում մամուլի վրա և ոստիկանությունը որևէ ձևով դրան չարձագանքեց»,–հայտարարեց նա և մի տուփ ձվեր դրեց փոխոստիկանապետի սեղանին։

Խաչատրյանը հայտարարեց, որ այսօր մեծ թվով ոստիկաններ դուրս են գալիս համակարգից.

«Եթե ոստիկանության վարկանիշը բարձր լիներ, մեծ թվով ոստիկաններ դուրս չէին գա համակարգից, իսկ այսօր շատերը դուրս են գալիս»,–ասաց նա և հավելեց. «Ոստիկանությունն այսօր կատարում է ոչ թե պետության շահը, այլ այն խմբակի կամքը, որը ներկայացնում է Սորոսը և մենք այսօր ո՛չ ենք ասելու Սորոսին և կանգնեցնելու ենք Սորոսի վկաներին»։

Այնուհետև Խաչատրյանը «Սորոսի վաստակի»  վկայականներ նվիրեց բանախոսներին։

Տեսանյութը՝