Իսրայելում ցուցարարները պահանջել են արաբա-հրեական միասնության կառավարություն
Թել Ավիվում ցուցարարները պահանջել են կառավարություն, որում ընդգրկված լինեն թե՛ հրեական, թե՛ արաբական կուսակցություններ։ Ոստիկանությունը ցրել է ճանապարհային երթևեկությունը արգելափակած ակտիվիստներին։ Այդ մասին տեղեկացնում է «Արմենպրես»-ը՝ վկայակոչելով Euronews-ը։
Ձախակողմյան ակտիվիստները քաղաքով երթ անցկացնելիս փակել են ճանապարհները, ինչի հետևանքով ոստիկանությունը միջամտել է և ցրել հավաքը։ Ցուցարարները բախվել են ոստիկանության հետ։
Ընտրությունների անորոշ արդյունքը ստիպել է Նեթանյահուին և ընդդիմադիր կուսակցություններին փնտրել խորհրդարանական մեծամասնություն։ Ընդ որում՝ Իսրայելի արաբ բնակչությունը ներկայացնող կուսակցությունները կարող են վճռորոշ դեր խաղալ կոալիցիոն բանակցություններում։
Բողոքի ակցիայի մասնակիցները պնդել են, որ կառավարությունը, որում ընդգրկված կլինեն թե՛ հրեական, թե՛ արաբական կուսակցություններ, կարող է հիմք ստեղծել քաղաքական փոփոխությունների համար։
Իսրայելում խորհրդարանական ընտրություններից հետո իշխող կոալիցիա չի ձևավորվել։
