Ժնևում մեկնարկել է Իրանի և ԱՄՆ-ի միջև անուղղակի բանակցությունների երկրորդ փուլը
Ժնևում՝ Օմանի գլխավոր հյուպատոսությունում, մեկնարկել է Իրանի և ԱՄՆ-ի միջև Իրանի միջուկային ծրագրի շուրջ անուղղակի բանակցությունների երկրորդ փուլը։ Այս մասին հայտնել է իրանական Press TV հեռուստաալիքը։
Ինչպես և նախորդ փուլերում, օրակարգը կենտրոնացած է բացառապես միջուկային խնդրի և Իրանի դեմ ԱՄՆ պատժամիջոցների չեղարկման վրա։
«Ակնհայտ է, որ բանակցությունները վերաբերելու են միջուկային խնդրին», – բանակցությունների մեկնարկից անմիջապես առաջ լրագրողներին հայտարարել է Իրանի ԱԳՆ ներկայացուցիչ Էսմայիլ Բաղային։
Նա նշել է, որ բանակցությունների ձևաչափը նման կլինի փետրվարի 6-ին Մասկատում կայացած բանակցություններին, երբ Իրանի և ԱՄՆ-ի բանակցային խմբերը իրենց ուղերձներն են փոխանցել Օմանի արտաքին գործերի նախարար Բադր ալ-Բուսաիդիի միջոցով և պայմանավորվել են շարունակել բանակցային գործընթացը:
Բանակցություններում ամերիկյան կողմը գլխավորում է ԱՄՆ նախագահի հատուկ բանագնաց Սթիվ Ուիթքոֆը, իսկ իրանական կողմը ներկայացնում է Իրանի արտգործնախարար Աբաս Արաղչին:
Նախօրեին Արաղչին ԱԷՄԳ-ի ղեկավար Ռաֆայել Գրոսիի հետ քննարկել է Իրանի միջուկային ծրագիրը, ինչպես նաև բանակցություններ է վարել ալ-Բուսաիդիի հետ:
