Հայաստանի պետական սիմֆոնիկ նվագախումբը ելույթ կունենա Գերմանիայի 15 քաղաքի հեղինակավոր համերգասրահներում
Հայաստանի պետական սիմֆոնիկ նվագախումբը՝ գեղարվեստական ղեկավար և գլխավոր դիրիժոր Սերգեյ Սմբատյանի ղեկավարությամբ, նոյեմբերի 16-ից դեկտեմբերի 2-ը հյուրախաղերով հանդես կգա Գերմանիայում։
Նվագախումբը Գերմանիա է մեկնում 15 քաղաքների հայտնի համերգասրահների հրավերով։ Հայաստանի պետական սիմֆոնիկ նվագախումբը հանդես կգա անվանի արտիստների հետ՝ ներկայացնելով հայ կատարողական և կոմպոզիտորական արվեստն ու դասական երաժշտության գլուխգործոցները։ Նվագախմբից հայտնում են, որ ելույթները տեղի կունենան Գյոպինգենի, Քեմփթենի, Ֆիլինգեն-Շվենինգենի, Մանհայմի, Նյուրնբերգի, Ինգոլշտադտի, Դորտմունդի, Մյուլհայմ ան դեր Ռուրի, Աշաֆենբուրգի, Քյոլնի, Վիսբադենի, Էսսենի, Ֆիբելի, էրկելենցի, Էմդենի համերգասրահներում։
Հայաստանի պետական սիմֆոնիկ նվագախմբի տնօրեն Սարգիս Բալբաբյանի խոսքով, նվագախումբը մեկնում է իր 20-րդ համերգաշրջանի ամենաերկար ճամփորդություններից մեկին։
«Մեզ համար շատ կարևոր ու պատվաբեր հյուրախաղեր են՝ ներկայացնելու Հայաստանը և մեր նվագախմբի կատարողական արվեստը Գերմանիայի խստապահանջ ունկնդրին։ Հայաստանի պետական սիմֆոնիկ նվագախմբի առաքելություններից մեկը հայ կոմպոզիտորական արվեստի հանրահռչակումն է աշխարհում, և այս հյուրախաղերը կարևոր խթան են այդ ճանապարհին։ Համերգային ծրագրերում ընդգրկված են Արամ Խաչատրյանի, Էդվարդ Միրզոյանի, Ալեքսանդր Հարությունյանի ստեղծագործությունները»,- նշել է Սարգիս Բալբաբյանը։
