Պուտինը և Թրամփը քննարկել են նաև ՌԴ-ԱՄՆ-Չինաստան եռակողմ հանդիպման հնարավորությունը
Ռուսաստանի և ԱՄՆ-ի նախագահներ Վլադիմիր Պուտինն ու Դոնալդ Թրամփը սեպտեմբերի 8-ին հեռախոսազրույցի ընթացքում քննարկել են Ասիա-խաղաղօվկիանոսյան տնտեսական համագործակցության (ԱԽՏՀ) գագաթնաժողովի շրջանակներում Ռուսաստան-ԱՄՆ-Չինաստան եռակողմ գագաթնաժողովի անցկացման հնարավորությունը:
Այս մասին հաղորդում է «Ինտերֆաքս» գործակալությունը՝ վկայակոչելով ՌԴ նախագահի մամուլի քարտուղար Դմիտրի Պեսկովին։
Կրեմլի խոսնակին հարց են ուղղել՝ արդյոք նման հանդիպման հնարավորություն քննարկվել է Պուտինի և Թրամփի հեռախոսազրույցի ժամանակ։ «Անշուշտ, և ավելի վաղ նույնպես նման հնարավորության մասին հիշատակվել է, և այդպիսի հնարավորություն կլինի», – լրագրողներին ասել է Պեսկովը։
Ավելի վաղ ՌԴ նախագահի օգնական Յուրի Ուշակովը տեղեկացրել էր, որ Ռուսաստանի և Միացյալ Նահանգների նախագահները հեռախոսազրույց են ունեցել, ներկայացնելով հարցազրույցից որոշ մանրամասներ։
