Ընդդիմության խնդիրը այդ հետապնդումներն իր համար էֆեկտի վերածելն ու Փաշինյանի համար դրանց էֆեկտիվությունը չեզոքացնելն է. քաղաքագետ
Քաղաքագետ Հակոբ Բադալյանը գրում է. «Անդրանիկ Թևանյանի դեմ իրականացվողը պայմանավորված է նախընտրական քաղաքական նկատառումով: Այստեղ չունեմ կասկած:
Միաժամանակ «կասկածելի» է, թե հատկկապես ի՞նչ էֆեկտ է դա ունենալու: Ավելի շուտ՝ ու՞մ համար է դա ունենալու ավելի մեծ էֆեկտ: Էֆեկտ ունենալու է այդ գործողության ակնհայտ քաղաքական ցուցումը տված վարչապետ Փաշինյանի՞, թե՞ այդ գործողության թիրախում հայտնված ուժի՝ Թևանյանի, նրա առաջնորդած Մայր Հայաստան կուսակցության կամ ԲՀԿ համար, որի ծրագրային ներառումով է Մայր Հայաստանը ներգրավված խորհրդարանի ընտրության պրոցեսին:
Իհարկե ավելորդ է խոսել այն մասին, որ ընտրապայքարը մեղմ ասած անհավասար է: Մտածել, թե այն լինելու էր հավասար և Նիկոլ Փաշինյանը չէր օգտագործելու իշխանության լծակները, մեղմ ասած կլիներ չափից դուրս միամիտ: Հետևաբար իրավիճակը հանգում է այն կետին, թե ընդդիմությունը որքանով է կարողանալու հմուտ լինել այդ անհավասարության դրսևորումներն իր օգտին շրջելու հարցում: Իսկ դա իհարկե քաղաքականության արվեստի կարևոր հատկանիշներից է:
Հետևաբար, ընդդիմության խնդիրը այդ հետապնդումներն իր համար էֆեկտի վերածելն ու Փաշինյանի համար դրանց էֆեկտիվությունը չեզոքացնելն է: Որովհետև ինքնին չեզոքացնել այդ գործիքակազմի կիրառումը՝ իրատեսական չէ»:
