Ինչո՞ւ է ՀՀ-ում ՌԴ դեսպանը գնացել ԿԸՀ. Վահագն Հովակիմյանի պարզաբանումը
«Հայաստանում Ռուսաստանի դեսպանը հանդիպման խնդրանքով դիմել էր մոտ երկու շաբաթ առաջ։ Ինքը եկել էր ծանոթանալու ընտրությունների նախապատրաստական ընթացքին, նաև ՌԴ ԿԸՀ նախագահի հնարավոր այցի նախապատրաստման համար»,- ԱԺ-ում լրագրողների հետ զրույցում ասաց ԿԸՀ նախագահ Վահագն Հովակիմյանը՝ պատասխանելով ՌԴ դեսպանի՝ ԿԸՀ-ում հյուրընկալվելու մասին լրագրողի հարցին։
ԱՊՀ միջխորհրդարանական վեհաժողովը Հայաստանի ԱԺ ընտրություններում դիտորդական առաքելություն է իրականացնելու։ Վ. Հովակիմյանի խոսքով, այսօր արդեն առաքելության առաջին 14 անդամների վկայականները պատրաստ են, և ԱԳՆ-ի միջոցով կփոխանցվի ԱՊՀ գործընկերներին։
«Ռուսաստանի ԿԸՀ-ն արդեն մեր հրավերով է ժամանում։ Մենք բոլոր մեր գործընկեր երկրների ընտրական մարմինների ներկայացուցիչներին հրավիրում ենք»,- ասաց Վ. Հովակիմյանը։
Հիշեցնենք, որ նախօրեին ՀՀ-ում ՌԴ դեսպան Սերգեյ Կոպիրկինը և դեսպանության առաջին քարտուղար Ալեքսանդր Մալիշևը ապրիլի 9-ին հյուրընկալվել են ՀՀ ԿԸՀ-ում։ Հյուրերին ընդունել է ԿԸՀ նախագահ Վահագն Հովակիմյանը։ Դեսպանը հետաքրքրվել է առաջիկա համապետական ընտրությունների նախապատրաստական ընթացքից։
