Հնդկաստանի վարչապետը հեռախոսազրույց է ունեցել Թրամփի հետ երրորդ անգամ՝ վերջինիս՝ 50% մաքսատուրքերի սահմանումից ի վեր
Հնդկաստանի վարչապետ Նարենդրա Մոդին հայտարարել է, որ հինգշաբթի հեռախոսազրույց է ունեցել ԱՄՆ նախագահ Դոնալդ Թրամփի հետ, քանի որ Նյու Դելին ձգտում է վերացնել Վաշինգտոնի կողմից երկրի որոշ հիմնական արտահանման ապրանքների վրա սահմանված 50% մաքսատուրքերը։
«Մենք վերանայեցինք մեր երկկողմ հարաբերությունների առաջընթացը և քննարկեցինք տարածաշրջանային և միջազգային զարգացումները»,- գրել է Մոդին X սոցիալական ցանցում։
Հնդկաստանի վարչապետը Թրամփի հետ իր զրույցը որակել է որպես «ջերմ և հետաքրքիր» և նշել, որ երկու երկրները կշարունակեն համատեղ աշխատել համաշխարհային խաղաղության, կայունության և բարգավաճման համար։
Մոդին և Թրամփը երեք անգամ զրուցել են՝ Թրամփի՝ հնդկական ներմուծման մաքսատուրքերը մինչև 50% կրկնապատկելուց ի վեր. վերջինս հարվածեց տեքստիլի, քիմիական նյութերի և սննդամթերքի, մասնավորապես ծովախեցգետնի արտահանմանը, գրում է Reuters-ը:
Երկու կողմի միջև առևտրային բանակցությունները դադարեցվել են հուլիսի վերջին, երբ Հնդկաստանը հրաժարվեց բացել իր շուկան ամերիկյան գյուղատնտեսական ապրանքների համար և ճանաչել նախագահ Թրամփի դերը Հնդկաստան-Պակիստան հակամարտության միջնորդության գործում։
Այդ ժամանակից ի վեր բանակցությունները շարունակվել են, երբ հնդկական վերամշակող ընկերությունները կրճատել են ռուսական նավթի գնումները, և ԱՄՆ-ն պատժամիջոցներ է կիրառել «Ռոսնեֆտ»-ի և «Լուկօյլ»-ի նկատմամբ՝ Ուկրաինայի պատերազմի պատճառով Մոսկվայի վրա ճնշում գործադրելու համար: ԱՄՆ առևտրային ներկայացուցչի տեղակալ Ռիք Սվիցերը երկօրյա այցով Նյու Դելիում է՝ առևտրային կապերը քննարկելու համար։
Ռուսաստանի նախագահ Վլադիմիր Պուտինն անցյալ շաբաթ պետական այցով մեկնեց Նյու Դելի և Հնդկաստանին առաջարկեց վառելիքի անխափան մատակարարում՝ միաժամանակ խոսելով ԱՄՆ-ի կողմից Հնդկաստանի վրա ճնշման դեմ:
