Երևանում օդի աղտոտվածությունն առաջին հերթին պայմանավորված է աշխարհագրական դիրքով․ Տիգրան Ավինյան
«Օդի որակի չափումներից ստացված տվյալները խոսում են այն մասին, որ օդի որակը մեզ մոտ վատթարանում է նոյեմբերի կեսերից, սկսում է բարելավել մարտի կեսերից»,- Երևանի քաղաքապետարանի գործակարգավարական խորհրդակցության ժամանակ ասել է քաղաքապետ Տիգրան Ավինյանը։
Ըստ նրա, ամենացավալին այն է, որ բավականին բարդ գործոններով է պայմանավորված. առաջին հերթին աշխարհագրական դիրքով, այս սեզոնին նաև որոշակի եղանակային պայմաններով։
«Իհարկե, լուծումներ կան, որոնք շատ բարդ են։ Եվ այդ լուծումները շատ դեպքերում նույնիսկ Երևանի սահմաններից դուրս պետք է իրականացվեն, մասնավորապես եթե երկարաժամկետ լուծումների մասին ենք խոսում, խոսքը հարյուրավոր հեկտարներով նոր անտառածածկ մշտադալար կանաչապատ տարածքների ստեղծման մասին է, որոնք որոշակի պատնեշ կարող են ստեղծել եկող քամիների նկատմամբ»,- ասաց Ավինյանը։
Կարճաժամկետ լուծումների պարագայում, նրա խոսքով, կարող են 10-15 օր մի փոքր ստանդարտից դուրս վարչարարական աշխատանք անել, ինչը 20 տոկոսի ազդեցություն կունենա։
