«Վերելք»․ ՀԻՄՆԱՐԱՐ ՓՈՓՈԽՈՒԹՅՈՒՆՆԵՐԻ ԺԱՄԱՆԱԿԸ․ հյուրը՝ Վանո Դադոյան (տեսանյութ)
«Ինչո՞ւ մեզ մոտ բանական քննարկումներ չեն լինում, և չեն քննարկվում ազգի մոտ ու հեռու ապագային վերաբերող հարցեր։
Մինչդեռ դատավճռի նման հնչող կարծիքներ՝ ինչքան ասես։
Սրբության խորհուրդը չիմացողը կամ նույնիսկ արհամարհողը խոսում է սրբությունից, ձեռնադրման հոգևոր խորհուրդը չիմացողը՝ հրաժարականից,
կյանքում անաղարտության խորհուրդը չիմացողն ու չպահպանողը՝ բարոյականությունից, և այսպես շարունակ։
Իսկ փորձագետները դարձել են տարբեր պետությունների շահերի պաշտպաններ կամ փնովողներ, բայց աշխարհի այս խայտառակ իրողության պարագայում ոչ ոք չի խոստովանում, որ ինչ-որ հարցում սխալվել է։
Ցավոք, ժողովրդավարության անվան տակ պատերազմում են ու սպանում անմեղ մարդկանց, և ոչ ոք պատասխան չի տալիս դրա համար։ Եվրոպան, ազատվելով մի բռնակալից, նրան համարժեք մեկ այլ բռնակալի քարտեզներով է առաջնորդվում, և դեռ ավելին՝ մարդասպանների ու ատելություն քարոզողների հետ բանակցում է կեղծ խաղաղության օրակարգերի շուրջ:
Աշխարհն իրոք կարիք ունի հիմնարար փոփոխությունների իրական ժողովրդավարության ճանապարհով, վերանայելով հին մոտեցումները՝ տարբեր ազգերի ու մշակույթների բերելով նոր համագործակցային զարգացման ու ներդաշնակման համընդհանրական համակարգի:
Իսկ մենք, քնած ուղտի ականջում, տունտունիկ ենք խաղում։ Մինչդեռ հարկավոր է համահայկական համախմբում մեր ազգային ինքնության շուրջը՝ նրա պահպանման ու զարգացման, այս նոր աշխարհում մեր տեղն ու դերը հաստատելու համար»:
«Վերելք» հաղորդաշարը զրույցի է հրավիրել վերը բերված խոհերի հեղինակ Վանո Դադոյանին։
