ՌԴ դեսպանատունը հայտնել է, որ ռուսաստանցիները կարող են Իրանից հեռանալ Հայաստանով
Ռուսաստանի քաղաքացիները կարող են Իրանից ցամաքային ճանապարհով հեռանալ Հայաստանով, հայտնել է Երևանում Ռուսաստանի դեսպանատունը։ Մենք տեղեկացնում ենք Ռուսաստանի քաղաքացիների համար Իրանից Հայաստան ցամաքային ճանապարհով մեկնելու լրացուցիչ տարբերակների մասին՝ իրանա-հայաստանյան սահմանի «Նորդուզ»/«Ագարակ» սահմանային անցակետով, նշվել է դիվանագիտական առաքելության Telegram-ալիքի հայտարարությունում։
Դեսպանատանն ավելացրել են, որ Իրանի և Հայաստանի միջև սահմանը բաց է Ռուսաստանի քաղաքացիների համար, անցումը անվճար է օտարերկրյա կամ ներքին վավեր անձնագրերով, նախնական ծանուցում չի պահանջվում։
Դիվանագիտական առաքելությունը նաև մանրամասն տեղեկատվություն է տրամադրել Մեղրիից Երևան, ապա՝ Ռուսաստան հասնելու վերաբերյալ։ Մասնավորապես, մասնավոր ավտոբուսներն ամեն օր մեկնում են Հայաստանի մայրաքաղաք. մեկնումը՝ ժամը 07:30-ին Մեղրիի քաղաքային հրապարակից, մեկ տեղի արժեքը 5 հազար դրամ է (13 դոլար)։ «Ագարակ» անցակետից տաքսիներ են մեկնում Երևան, տևողությունը՝ 7,5 ժամ, հեռավորությունը՝ 328 կիլոմետր, արժեքը՝ մոտ 50 հազար դրամ (130 դոլար) կամ մեքենայում մեկ տեղի համար՝ 10 հազար դրամ (26 դոլար)։
Մեղրիից Կապան կարելի է հասնել նաև տաքսիով (1.5 ժամ ճանապարհ դեպի Երևան, արժեքը՝ 12 հազար դրամ, (31 դոլար), որի օդանավակայանից երկուշաբթիից ուրբաթ ժամը 13:00-ին կանոնավոր չվերթ է իրականացվում դեպի Երևան։ Օրական մինչև 20 ուղիղ չվերթ է իրականացվում Երևանից Ռուսաստան՝ մի քանի ավիաընկերությունների կողմից։ «Խորհուրդ է տրվում ուշադիր հետևել ռուսաստանյան արտասահմանյան հաստատությունների, ավիաընկերությունների և տուրօպերատորների հաղորդագրություններին/զգուշացումներին։ Անհրաժեշտության դեպքում զանգահարել արտակարգ իրավիճակների հեռախոսահամարով»,- ընդգծել են դեսպանատանը։
