Ուկրաինան կա՛մ միջուկային զենք կստեղծի, կա՛մ կանդամակցի ՆԱՏՕ-ին. Զելենսկի
Ուկրաինան կա՛մ միջուկային զենք կստեղծի, կա՛մ կանդամակցի ՆԱՏՕ-ին, հայտարարել է նախագահ Վլադիմիր Զելենսկին Եվրոպական խորհրդի նիստից հետո կայացած մամուլի ասուլիսում։
«Ո՞վ է հրաժարվել միջուկային զենքից: Բոլո՞րը. Ոչ, միայն Ուկրաինան: Ո՞վ է այսօր պատերազմում. Ուկրաինան: Եվ դրա համար մեզ մոտ այդպես է։ Դոնալդ Թրամփի հետ զրույցում ես նրան ասացի. «Ո՞րն է ելքը։ Կամ Ուկրաինան միջուկային զենք կունենա, և դա մեզ համար պաշտպանություն է, կամ մենք պետք է ինչ-որ դաշինք ունենանք»: Բացի ՆԱՏՕ-ից, մենք այսօր չգիտենք որևէ արդյունավետ դաշինք»,- Զելենսկու խոսքերն է մեջբերում ուկրաինական «Գրոմադսկե» պարբերականը:
Պետության ղեկավարը հավելել է, որ Կիևն ընտրել է Հյուսիսատլանտյան դաշինքը, այլ ոչ թե միջուկային զենքի ստեղծումը։ «Ես կարծում եմ, որ Դոնալդ Թրամփը լսել է ինձ այս դեպքում։ Նա ասաց. «Դուք արդար փաստարկներ ունեք», – հավելել է Զելենսկին:
Ըստ Bild-ի վերլուծաբան Ջուլիան Ռոպկեի՝ Զելենսկու հայտարարությունը «ցնցում» էր արևմտյան լրագրողների համար։
Նրա խոսքով՝ մի քանի ամիս առաջ ուկրաինացի բարձրաստիճան պաշտոնյան պարբերականին և քաղաքական գործիչների նեղ շրջանակի այլ անդամներին ասել է, որ Ուկրաինան չի հաշտվի Կիևի վրա ռուսական բանակի երկրորդ արշավանքի հետ։
«Մենք ունենք նյութեր, ունենք գիտելիք։ Եթե լինի հրաման, մեզնից ընդամենը մի քանի շաբաթ կպահանջվի առաջին ռումբը ստանալու համար: Արևմուտքը պետք է «ավելի քիչ մտածի Ռուսաստանի կարմիր գծերի և շատ ավելին մեր կարմիր գծերի մասին», – ասել է ուկրաինացի պաշտոնյան:
