Որտեղի՞ց է ՀԱՄԱՍ-ը զենք ստանում: Ավելի հաճախ՝ Իսրայելից. NYT
Իսրայելի պաշտոնյաները եկել են այն եզրակացության, որ հոկտեմբերի 7-ի հարձակման և Գազայում պատերազմի ժամանակ պաղեստինյան ՀԱՄԱՍ խմբավորման կողմից օգտագործված զենքի զգալի մասը ստացվել է անհավանական աղբյուրից՝ իսրայելական բանակից, գրում է The New York Times-ը։
Վերլուծաբանները նշել են մաքսանենգության երթուղիները՝ բացատրելու համար, թե ինչու ՀԱՄԱՍ-ը մնաց այդքան լավ զինված՝ չնայած Իսրայելի կողմից Գազայի հատվածի ռազմական շրջափակմանը:
Սակայն վերջին հետախուզական տվյալները ցույց են տվել, թե ինչպես է ՀԱՄԱՍ-ը կարողացել ստեղծել իր հրթիռներից ու հակատանկային զենքերից շատերը հազարավոր այն զինամթերքից, որոնք չեն պայթել, երբ Իսրայելը դրանք նետել է Գազա: ՀԱՄԱՍ-ը զինում է իր մարտիկներին նաև իսրայելական ռազմակայաններից գրաված զենքերով։
Հետախուզական տվյալները ցույց են տվել, որ ինչպես Իսրայելի իշխանությունները սխալ էին գնահատում ՀԱՄԱՍ-ի մտադրությունները հոկտեմբերի 7-ից առաջ, նրանք նաև թերագնահատել են զենք ձեռք բերելու նրա կարողությունը:
Այն, ինչ այժմ պարզ է, այն է, որ հենց այն զենքերը, որոնք իսրայելական ուժերն օգտագործել են Գազայի շրջափակումն իրականացնելու համար վերջին 17 տարիների ընթացքում, այժմ օգտագործվում են նրանց դեմ: Իսրայելական և ամերիկյան ռազմական պայթուցիկ նյութերը ՀԱՄԱՍ-ին հնարավորություն են տվել հրթիռներ արձակել Իսրայելի ուղղությամբ և Գազայից առաջին անգամ ներթափանցել իսրայելական քաղաքներ, ընդգծում է ամերիկյան պարբերականը։
Բոլոր հաշվարկներով, տարիներ շարունակվող ռմբակոծությունները և Գազայի վրա վերջին հարձակումները լցրել են տարածքը հազարավոր տոննաների չպայթած զինամթերքով, որոնք միայն սպասում են, որ նորից օգտագործվեն:
750 ֆունտ կշռող չպայթած մեկ ռումբը կարող է վերածվել հարյուրավոր հրթիռների, գրում է The New York Times-ը։
