Թուրքիայում բարձրաստիճան ոստիկանները «պեղումներ» են իրականացրել՝ «հայերի թաքցրած գանձերը» գտնելու հույսով
Թուրքիայի Դիարբեքիր նահանգում հայերից մնացած գանձեր գտնելու հույսով անօրինական «պեղումներ» իրականացնող խումբ է ձերբակալվել: Ermenihaber.am-ի տեղեկացմամբ, այդ մասին գրել է «Hurriyet»-ը։ Պարզվել է, որ գանձախույզներից չորսը Դիարբեքիրի նահանգի Սիլվան շրջանի ոստիկանության աշխատակիցներ են: Ձերբակալվածների թվում է նաև Սիլվանի շրջանի ոստիկանապետ Օմեր Օզթուրքը:
Տարածքում սկսված կասկածելի «պեղումները» նկատած բնակիչներն ահազանգել են Սիլվանի ոստիկանություն, ինչ մասին տեղեկացած նույն բաժանմունքի քննիչ Սերքան Ջ.-ն իրենց գործողություններին պաշտոնական բնույթ հաղորդելու և կասկածները ցրելու համար ոստիկանական զրահամեքենա է բերել տվել դեպքի վայր:
Ըստ աղբյուրի, այս ամենի մասին նախօրոք տեղեկացված Դիարբեքիրի նահանգային ոստիկանությունը հետևել է չարամիտների գործողություններին և կազմակերպած շուրջկալի արդյունքում ձերբակալել է խմբին, այդ թվում՝ Սիլվանի ոստիկանապետին:
Խմբի անդամները սկզբում պնդել են, թե փնտրում են Դիարբեքիրի Սուր շրջանում 2015-2016թթ. տեղի ունեցած բախումներից հետո այդտեղից դուրս եկած «Քրդստանի բանվորական կուսակցության» զինյալների թաքցրած ոսկիներն ու փողերը:
Սակայն ստուգումների արդյունքում ոստիկանության կողմից նման օպերացիա կազմակերպելու վերաբերյալ որևէ փաստաթուղթ չի հայտնաբերվել: Ավելի ուշ պարզվել է, որ խումբը փոսերը փորել է՝ նպատակ ունենալով գտնել Ցեղասպանության ընթացքում Սիլվանից աքսորված ու կոտորված հայերի թաքցրած ոսկիները:
Ձերբակալվածներին մեղադրանք է առաջադրվել շրջակա միջավայրին վնաս հասցնելու հոդվածի հատկանիշներով:
