Կյանքից հեռացել է «Ազգային ճակատ»-ի նախկին առաջնորդ Ժան Մարի Լը Պենը

Մահացել է Ֆրանսիայի ամենահայտնի քաղաքական գործիչներից մեկը՝ ծայրահեղ աջակողմյան «Ազգային ճակատ» կուսակցության հիմնադիր Ժան Մարի Լը Պենը, նա 96 տարեկան էր, հայտնում է Le Monde-ը։

Ժան Մարի Լը Պենը գլխավորել է «Ազգային ճակատ»-ը 1972-2011 թվականներին։ Նա հինգ անգամ առաջադրվել է նախագահական ընտրություններում և անցել է ընտրությունների երկրորդ փուլ 2002 թվականին, սակայն պարտվել է Ժակ Շիրակին՝ հավաքելով ձայների 17,8%-ը։

Նա կասկածի տակ էր դրել Հոլոքոստի փաստը, դատվել էր ռասիզմի և հակասեմականության համար, մի քանի անգամ կռվի մեջ էր մտել սոցիալիստ մրցակիցների հետ։

2011 թվականին Լը Պենը կուսակցության ղեկը փոխանցել է դստերը՝ Մարին լը Պենին: 2015-ին նա հեռացվել է «Ազգային ճակատ»-ից։ 2018 թվականին կուսակցությունն անվանափոխվել է «Ազգային միավորում»։