ԵՄ-ը Վրաստանին կոչ է արել վերանայել «ընտանեկան արժեքների» մասին օրենսդրական փաթեթը
Եվրամիությունն ափսոսանք է հայտնել երկրորդ ընթերցմամբ «ընտանեկան արժեքների և անչափահասների պաշտպանության» մասին օրենսդրական փաթեթի ընդունման առիթով, այս մասին նշվել է ԵՄ ներկայացուցչի հայտարարությունում։
Ինչպես նշված է հայտարարության մեջ, այդ փաթեթը խափանում է վրաց ժողովրդի հիմնարար իրավունքները և կրում է հետագա ստիգմատիզացիայի և խտրականության վտանգ բնակչության մի մասի համար։
«ԵՄ-ը ափսոսում է, որ օրենսդրությունը, որը կարևոր հետևանքներ ունի ԵՄ-ին ինտեգրման ճանապարհին, ընդունվել է առանց հանրային քննարկումների և մանրակրկիտ վերլուծության եվրոպական և միջազգային չափորոշիչների համապատասխան»,- նշվել է հայտարարությունում։
ԵՄ-ում հիշեցրել են, որ մարդու իրավունքների ապահովումը և պաշտպանությունն ընկած են ընդլայնման գործընթացի հիմքում, որն ամեն տարի գնահատվում է ընդլայնման մասին Եվրոպական հանձնաժողովի հաշվետվությունում։
«ԵՄ-ը Վրաստանի իշխանություններին կոչ է անում լիովին վերանայել այդ օրենսդրական փաթեթը։ Այդ առաջարկը, քաղաքացիական հասարակության համար սահմանափակումների համադրմամբ, որը դրել է Օտարերկրյա ազդեցության թափանցիկության մասին օրենքը, կհանգեցնի ԵՄ-ի և Վրաստանի հարաբերությունների հետագա վատացման»,- նշել են հայտարարությունում։
ԵՄ-ում նաև հիշեցրել են, որ ԵՄ-ին Վրաստանի անդամակցության գործընթացը դե-ֆակտո դադարեցվել է, և իշխանություններին կոչ են արել հաստատել հավատարմությունը ԵՄ-ին ինտեգրման գծին։
Հիշեցնենք, որ Վրաստանի խորհրդարանը ընդունել է օրինագծերի փաթեթ, որը նախատեսում է ԼԳԲՏ իրավունքների սահմանափակում։ Դրա հաստատման համար քվեարկել է մեծամասնության 81 պատգամավոր (դեմ՝ 0)։ Օրինագծերի փաթեթը՝ «Ընտանեկան արժեքների և անչափահասների պաշտպանության մասին» ընդհանուր անվանմամբ, նախատեսում է փոփոխություններ 18 գործող օրենքներում։
