Ադրբեջանական կողմը հաղորդում է, թե Փաշինյանը հրաժարվել է Մեծ Բրիտանիայում հանդիպել Ալիևի հետ. Տաթևիկ Հայրապետյան
Ադրբեջանի հարցերով փորձագետ Տաթևիկ Հայրապետյանը տելեգրամյան իր ալիքում գրում է, որ ադրբեջանական կողմը հաղորդում է, թե Նիկոլ Փաշինյանը հրաժարվել է Մեծ Բրիտանիայում հանդիպել Իլհամ Ալիևի հետ։
«Ադրբեջանի նախագահի օգնական Հիքմեթ Հաջիևն էլ նշել է, որ Փաշինյանի հրաժարումը Իլհամ Ալիևի հետ հանդիպելուց համարում են նահանջ խաղաղության օրակարգից։
Լավ կլիներ, որ ՀՀ կառավարության ղեկավարը մի պահ շեղվեր հեծանիվի թեմայից ու հավուր պատշաճի իրազեկում լիներ, թե ինչ է տեղի ունեցել իրականում, թե չէ Ադրբեջանն արդեն ամբողջությամբ իր խոսույթն է տարածում տեղեկատվական տիրույթում»,- գրում է նա։
Հիշեցնենք, որ ադրբեջանական «Թուրան» լրատվական գործակալությունը երեկ փոխանցեց, որ ոչ պաշտոնական տվյալներով՝ գագաթնաժողովի շրջանակներում տեղի կունենա Ադրբեջանի և Հայաստանի բարձրաստիճան ներկայացուցիչների հանդիպում, իսկ հայկական և ադրբեջանական կողմերը չեն հաստատել այդ տեղեկությունները։
