Մոսկվայի կողմից Ղարաբաղը Բաքվին հանձնելու մասին ՀՀ ԱԽ քարտուղարի հայտարարությունները բացարձակ սուտ են. Զատուլին
Ռուսաստանի կողմից Լեռնային Ղարաբաղը Ադրբեջանին փոխանցելու մասին Հայաստանի Անվտանգության խորհրդի քարտուղար Արմեն Գրիգորյանի հայտարարությունները բացահայտ սուտ են, ըստ РИА Новости-ի՝ հայտարարել է Պետդումայի ԱՊՀ հարցերով կոմիտեի նախագահի առաջին տեղակալ Կոնստանտին Զատուլինը։
«Պարոն Գրիգորյանը նույնիսկ ավելի մեծ ռուսատյաց է, քան իր գործատուն՝ Նիկոլ Փաշինյանը, և մի շարք դեպքերում կանխատեսում կամ հրապարակում է այն, ինչ իր ղեկավարի մտքին է։ Այս դեպքում խոսքը բացահայտ ստի մասին է»,- ասել է Զատուլինը։
Ռուսաստանցի պատգամավորը նշել է, որ Ղարաբաղը «ոչ միայն ավելորդ է ՀՀ վարչապետ Նիկոլ Փաշինյանի համար, այլ նաև ներքին քաղաքական առումով՝ նրա համար վնասակար, դրա համար էլ նախընտրել է իր արևմտյան ընկերների օրինակին հետևել»։
«Նա բարդ դրության մեջ դրեց Լեռնային Ղարաբաղում ռուսական խաղաղապահ առաքելությանը։ Դա, ըստ երևույթին, Արևմուտքի հետ նրա նոր բարեկամության պայմանն էր։ Չէ՞ որ Արևմուտքին Ղարաբաղում ռուս խաղաղապահներ պետք չեն։ Ինչպես, թերևս, Հայաստանի անդամակցությունը ՀԱՊԿ-ին կամ ռուսական բազայի առկայությունը Գյումրիում։ Սրանք, ըստ երևույթին, հաջորդ հարցերն են, և դա ինքն ու պարոն Փաշինյանի կողմնակիցները չեն էլ թաքցնում»,- շեշտել է Զատուլինը։
