Սնունդ ձեռք բերելու համար Արցախում բազմամարդ հերթերում գրանցվում են ուշագնացության դեպքեր (տեսանյութ)
Սնունդ ձեռք բերելու համար Արցախում բազմամարդ հերթերում գրանցվում են ուշագնացության դեպքեր: Այս մասին հաղորդում է Արցախի ՄԻՊ-ը:
«Շարունակվող շրջափակման հետեւանքով Արցախում ստեղծված հումանիտար ծանրագույն պայմաններում հազարավոր քաղաքացիներ ստիպված են ժամերով հերթ կանգնել ինչ-որ նվազագույն քանակի սնունդ կամ առաջին անհրաժեշտության ապրանք ձեռք բերելու համար:
Այդ բազմամարդ հերթերում հաճախակի գրանցվում են ուշագնացության դեպքեր, որոնք ուղղակիորեն կապված են բնակիչների հոգեկան գերլարված իրավիճակով, թերսնուցման պայմաններում իմունային համակարգի խոցելիությամբ եւ շոգ եղանակային պայմաններով:
Մեր ուսումանսիրությունները ցույց են տալիս, որ ուշագնացության դեպքերը գնալով աճում են: Սա անհերքելիորեն փաստում է, որ հումանիտար ծանրագույն իրավիճակն անմիջականորեն իր աղետալի հետեւանքներն է ունենում հանրային առողջության վրա՝ վտանգի տակ դնելով հազարավոր մարդկանց կյանքեր»,- ասվում է Արցախի ՄԻՊ-ի տարածած հաղորդագրությունում:
