2022-ին ԿԳՄՍՆ կապիտալ ծախսերը թերակատարվել են
2022 թվականին ՀՀ կրթության, գիտության, մշակույթի և սպորտի նախարարության կապիտալ ծախսերը թերակատարվել են՝ կազմելով ընդամենը 67,4 տոկոս։ Ընդ որում, ընթացիկ ծախսերը կատարվել են գրեթե ամբողջությամբ՝ կազմելով 97,3 տոկոս։ Այս մասին մայիսի 31-ին մշտական խորհրդարանական հանձնաժողովների համատեղ նիստում 2022 թվականի պետական բյուջեի կատարողականի հաշվետվության քննարկման ժամանակ ասաց ֆինանսների փոխնախարար Վահան Սիրունյանը։
Փոխնախարարի խոսքով, կապիտալ ծախսերը հիմնականում իրականացվել են դպրոցաշինության ոլորտում՝ «Ապահով դպրոց» ծրագրի շրջանակում։
«Ընթացիկ ծախսերը, որպես կանոն, համեմատաբար ավելի փոքր ազդեցություն են ունենում ՀՆԱ-ի աճի վրա, քան կապիտալ ծախսերը»,- նշեց Սիրունյանը։
Նա նշեց, որ իրենք համապատասխան եզրակացություններ են արել 2022 թվականի թվերից։ Ուստի ընթացիկ միջնաժամկետ ծախսերի պլանավորման գործընթացում իշխանությունները մտադիր են ծախսերի պլանավորումն այնպես իրականացնել, որ մինչև 2026 թվականն ավարտին հասցնեն 300 դպրոցի և 500 մանկապարտեզների շինարարությունը։
