Արտադրական կանեփի բիզնեսը կվերահսկվի օրենքով
Կառավարությունն իր այսօրվա՝ մայիսի 25-ի նիստում հավանություն տվեց «Շուկայի վերահսկողության մասին» օրենքի նախագծին, որով նախատեսվում է հստակեցնել մասնավորապես Շուկայի վերահսկողության տեսչական մարմնի աշխատանքը` ներդաշնակեցնել վերահսկողությանն առնչվող նորմերը, տեսչական մարմնի գործառույթները, իրականացվող վերահսկողության առանձնահատկությունները և ձևերը:
Օրենքով սահմանվում են շուկայի վերահսկողության ոլորտում ՀՀ կառավարության լիազորությունները, վերահսկողություն իրականացնող անձանց և տնտեսավարողների իրավունքները, պարտականությունները:
Օրենքով սահմանվում են նաև վերահսկողության մարմնի գործունեության հիմնական ոլորտները։ Դրանք են ոչ պարենային արտադրանքի, թանկարժեք մետաղների, արտադրական կանեփի արտադրության, ներմուծման, արտահանման կամ մեծածախ առևտրի ոլորտներում ռիսկերի կառավարումը, անվտանգության ապահովումը, ՀՀ օրենսդրությամբ սահմանված պահանջների պահպանումը և կանխարգելիչ միջոցառումների իրականացումը:
Օրենքի նախագիծը մշակվել է Վարչապետի աշխատակազմի տեսչական մարմինների աշխատանքների համակարգման գրասենյակի և Շուկայի վերահսկողության տեսչական մարմնի կողմից` համատեղ:
