Ազգային փոքրամասնության պատգամավորը կամուրջ է տվյալ համայնքի և պետական ապարատի միջև. Սանդիկով
Ազգային փոքրամասնության պատգամավորը տվյալ համայնքի և Կառավարության միջև իրական կապող օղակն է. ասել է ԱԺ «Քաղաքացիական պայմանագիր» խմբակցության պատգամավոր, Հայաստանում ռուսական համայնքի ներկայացուցիչ Ալեքսեյ Սանդիկովը խորհրդարանում փորձաշրջան անցնող ԵՊՀ միջազգային հարաբերությունների ֆակուլտետի ուսանողների հետ հանդիպմանը:
ԱԺ-ից հայտնում են, որ նա անդրադարձել է խորհրդարանի ազգային փոքրամասնության պատգամավորների ընթացիկ գործունեությանը, կարևորել այն մեծ օրենսդրական աշխատանքը, որ նրանք կատարում են ի պաշտոնե, ինչպես նաև շեշտադրել տարբեր խնդիրների շուրջ գործադիր իշխանության տարբեր մարմինների հետ համագործակցությունը, ինչի շնորհիվ լուծում են ստանում բազմաթիվ մեծ ու փոքր հարցեր:
Ալեքսեյ Սանդիկովն ընդգծել է ազգային փոքրամասնությունների լեզվի, մշակույթի պահպանման ու զարգացման խնդիրների լուծման գործում համատեղ աշխատանքի անհրաժեշտությունը: Պատգամավորն անդրադարձել է նաև Հայաստանում ռուսական թեքումով, ՌԴ-ում հայկական դպրոցների աշակերտներին մայրենի լեզվով դասագրքերով ապահովման խնդրին, տեղեկացրել, որ առաջիկայում ձեռք բերված պայմանավորվածության համաձայն, ռուսական կողմը մեր երկիր կառաքի շուրջ 60 հազար դասագիրք: Իսկ ՌԴ-ում գործող հայկական կրթօջախները կապահովվեն հայերեն դասագրքերով:
Ալեքսեյ Սանդիկովի հավաստմամբ այս տարվա մայիսի 9-ին ՌԴ մայրաքաղաքում տեղի ունենալիք ֆաշիզմի դեմ հաղթանակի զորահանդեսին ներկա կլինեն նաև Հայաստանի երկու վետերան, որոնց տարիքն արդեն անցնում է հարյուրը: «Մեծ հայրենականը մեր երկրի պատմության էջն է, Հայաստանից յուրաքանչյուր 3-րդը մասնակցել է պատերազմին, տվել ենք 100-ից ավելի հերոսներ, ունենք չորս մարշալ»,- նշել է ԱԺ պատգամավորը:
Պատասխանելով ուսանողներից մեկի` ռուսական խաղաղապահ զորքի Արցախում տեղակայման ժամկետի երկարաձգման վերաբերյալ հարցին` Ալեքսեյ Սանդիկովը փաստել է իր անձնական տեսակետը. «Քանի դեռ Հայաստանի և Ադրբեջանի միջև չկա խաղաղության պայմանագիր, քանի դեռ լուծված չէ Լեռնային Ղարաբաղի հարցը, ռուս խաղաղապահները պետք է մնան Արցախում»:
