Դատաիրավական բարեփոխումների դեմ կոչից հետո Նեթանյահուն պաշտոնանկ է արել Իսրայելի պաշտպանության նախարարին
Իսրայելի վարչապետ Բենիամին Նեթանյահուն աշխատանքից ազատել է պաշտպանության նախարար Յոավ Գալանտին նրա վերջին հայտարարությունից հետո, որում նախարարը վարչապետին կոչ էր արել դադարեցնել երկրում դատաիրավական փոփոխությունների գործընթացը։ Այս մասին գրում է The Jerusalem Post-ը։
Հաղորդվում է, որ Նեթանյահուն հրավիրել է Գալանտին հանդիպման և ասել, որ այլևս չի հավատում իրեն որպես պաշտպանության նախարարի:
Գալանտը մտահոգություն է հայտնել իսրայելական բանակում տեղի ունեցող անկարգությունների կապակցությամբ, որոնք, ըստ նրա, վտանգ են ներկայացնում երկրի անվտանգության համար: Վկայակոչելով ընդդիմության հետ երկխոսության անհրաժեշտությունը՝ Գալանտը Նեթանյահուի կոալիցիային խնդրել է սպասել մինչև հաջորդ ամիս արձակուրդից խորհրդարանի վերադարձը՝ նախքան Գերագույն դատարանը թուլացնելու իր պառակտիչ ծրագիրը առաջ տանելը:
«Հանուն Իսրայելի անվտանգության, հանուն մեր որդիների ու դուստրերի, օրենսդրական գործընթացը պետք է առայժմ կասեցվի», – ասել է Գալանտը։
«Իսրայելի հասարակության մեջ տեղի ունեցող իրադարձությունները չեն խնայում Իսրայելի պաշտպանության ուժերը. բոլոր կողմերից բարկության, ցավի և հիասթափության զգացումներ են առաջանում այնպիսի ինտենսիվությամբ, որը ես նախկինում չեմ զգացել», – նշել է նա՝ ընդգծելով․ «Ես տեսնում եմ, որ մեր ուժի աղբյուրը քայքայվում է»:
Դատական համակարգի նկատմամբ վերահսկողությունը մեծացնելու կառավարության ծրագիրը առաջացրել է Իսրայելի պատմության մեջ ամենամեծ բողոքի շարժումը և մեծ ազգային ճգնաժամ, ներառյալ քաղաքացիական պատերազմի մասին նախագահի նախազգուշացումները: