Գերմանիայում տեղի է ունենում վերջին տասնամյակների ամենամեծ գործադուլը․ Bild am Sonntag
Վերդիի արհմիության ղեկավար Ֆրենկ Վերնեկեն Bild am Sonntag-ին տված հարցազրույցում արդարացրել է երկուշաբթի օրը նախատեսված զանգվածային գործադուլը՝ որպես «գոյատևման խնդիր» հազարավոր մարդկանց համար, ովքեր աճող գնաճի պայմաններում պայքարում են բարձր աշխատավարձերի համար:
Ակնկալվում է, որ գործադուլը, որը տասնամյակների ընթացքում ամենամեծն է Գերմանիայում, կհանգեցնի Եվրոպայի խոշորագույն տնտեսության երկաթուղիների և օդանավակայանների լայնածավալ խափանումների:
«Մարդիկ ոչ միայն քիչ են վարձատրվում, այլև հուսահատորեն գերբեռնված են», – ասել է Վերնեկեն հրապարակմանը:
Գործադուլները, որոնք նախատեսվում է սկսել կեսգիշերից անմիջապես հետո՝ ազդելով սպասարկման ոլորտի վրա ողջ երկուշաբթի օրը, վերջին ամիսների ընթացքում հարվածել են եվրոպական խոշոր տնտեսություններին, քանի որ սննդամթերքի և էներգիայի գների բարձրացումը նվազեցնում է կենսամակարդակը:
Վերդին բանակցություններ է վարում պետական հատվածի մոտ 2,5 միլիոն աշխատակիցների անունից, այդ թվում՝ հասարակական տրանսպորտի և օդանավակայանների: Երկաթուղային և տրանսպորտային EVG արհմիությունը բանակցություններ է վարում Deutsche Bahn-ի և ավտոբուսային ընկերությունների շուրջ 230 հազար աշխատակիցների անունից:
Վերդին խնդրում է աշխատավարձի 10,5%-ով բարձրացում, ինչը կհանգեցնի ամսական առնվազն 500 եվրոյի աշխատավարձի բարձրացմանը, մինչդեռ EVG-ն պահանջում է 12%-ով կամ ամսական առնվազն ևս 650 եվրոյի բարձրացում:
«Գործադուլն անհրաժեշտ է, որպեսզի հասկացվի, որ մենք խստորեն պաշտպանելու ենք մեր պահանջները», – ասել է արհմիության ղեկավարը՝ հավելելով, որ աշխատավարձի զգալի բարձրացումը հազարավոր աշխատակիցների գոյատևման խնդիրն է:
