Ոստիկանների հատուկ նշանակության ջոկատները վաղ առավոտից բերման են ենթարկում ՀՅԴ-ականների. Գեղամ Մանուկյան
Այսօր վաղ առավոտյան իրավապահները սովորության համաձայն հերթական քաղաքական հետապնդման շրջնակներում Արարատի մարզի բազմաթիվ դաշնակցականների, Դիմադրության շարժման անդամների տներ են մտել խուզարկության: Այս մասին, այսօր՝ հունվարի 11-ին, ԱԺ պաշտպանության և անվտանգության հարցերի հանձնաժողովի նիստում հայտարարեց «Հայաստան» խմբակցության պատգամավոր Գեղամ Մանուկյանը:
«Ոստիկանները հատուկ նշանակության ջոկատներով, կարծես հերթական դիվերսանտներին էին հայտնաբերում, վաղ առավոտյան, ժամը 7-ին մտել են նաև մեր Արարատի մարզի կառույցի ղեկավար, ԱԺ աշխատակից Գերասիմ Վարդանյանենց տուն, հակառակ, որ մանկահասակ երեխաներ են եղել, խուզարկություն են իրականացրել: Բազմաթիվ մեր ընկերներ բերման են ենթարկված ոստիկանական բաժանմունքներ: Թեև մեր օրակարգում դրված է կարևոր հարց, մեր գործընկեր Գեղամ Նազարյանի օրենսդրական նախաձեռնությունն է, բայց խնդրելու եմ մեր գործընկերներին մասնակցել, նիստին ներկայացնել կարևոր սոցիալական բնույթ կրող այս օրենսդրական նախաձեռնությունը, իսկ ես ստիպված եմ լինելու մեկնել Արարատի մարզ, ինչպես մեր պատգամավոր գործընկերներ, բերման ենթարկված մեր ընկերներին տեսակցելու և փորձելու ինչ-որ ձև խոչընդոտել իշխանությունների քաղաքական, ուղղակի խայտառակ հետապնդումների այս հարցերը:
Այս երկրում կարմիր բերետավորները հարյուրավոր ոստիկաններ հավաքում են կառավարության շենքի դիմաց, որ Նիկոլ Փաշինյանը մի մասնաշենքից գնա մյուս մասնաշենք: Ամբողջ այդ տարածքից մեքենաներն ազատում են փոխանակ զբաղվելու Լաչինի միջանցքն ազատելով»,- հայտարարեց նա:
Հանձնաժողովի նախագահ Անդրանիկ Քոչարյանն արձագանքեց. «Ճանապարհը սառած է, դանդաղ քշեք մեքենան»: Գեղամ Մանուկյանն էլ պատասխանեց. «Մի անհանգստացեք ինձ համար, անհանգստացեք Լաչինի միջանցքի համար, որ այս հանձնաժողովում կատակներ չանեք դրա մասին»:
