Լարվածությունը կտեղափոխվի նաև Հայաստան․ Անդրանիկ Քոչարյանը՝ Արցախում տիրող իրավիճակի մասին

Այս պահին Արցախում տիրող իրավիճակն Ադրբեջանի կողմից պլանավորված սադրանքների հետևանք է: Իսկ թե ինչպես պետք է չեզոքացվի, հրադադարը պահպանող հիմնական ուժային բլոկը պետք է հետևություններ անի, կանխատեսի, գուցե նաև ադրբեջանական կողմին հեռու պահի նման մտադրություններից: Այս մասին դեկտեմբերի 12-ի խորհրդարանական ճեպազրույցների ընթացքում ասել է ՀՀ ԱԺ «Քաղաքացիական պայմանագիր» խմբակցության պատգամավոր, Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը` պատասխանելով լրագրողի` այս պահին Արցախում տիրող լարված իրավիճակի, մասնավորապես, Շուշիի հատվածում ճանապարհը փակելու և ադրբեջանցիների կողմից վրան տեղադրելու վերաբերյալ հարցին, փոխանցում են ՀՀ Ազգային ժողովի պաշտոնական կայքէջից։

Լրագրողը հետաքրքրվել է Արցախի Կաշենի հանքավայրի շուրջ տեղի ունեցող գործընթացներով: Նշենք, որ օրեր առաջ իբրև «բնապահպան», ադրբեջանցիները փորձել են մտնել Կաշենի հանքավայր: «Ինչո՞ւ Արցախի իշխանությունների հետ չեն համաձայնեցրել, միայն խաղաղապահների թույլտվությամբ է մեկօրյա այց նախատեսվել»,- հարցրել է լրագրողը:

Անդրանիկ Քոչարյանն այս կապակցությամբ նշել է. «Ես կարծում եմ, որ Ադրբեջանի իշխանություններն իրականացնում են լավ պլանավորված սադրիչ գործողություններ` դրանով լարվածություն ստեղծելով Արցախում: Բնականաբար, ակնկալիքն այն է, որ լարվածությունը կտեղափոխվի նաև Հայաստան: Ես կարծում եմ, որ պետք է լինել սառնասիրտ: Իրենց  ցանկություններն իրենց ցանկություններն են, մեր նպատակները մնում են նույնը` անվտանգ կյանք Արցախի մեր հայրենակիցների համար և անվտանգության միջավայրի կառուցում Հայաստանի և Արցախի միասնական անվտանգային տարածքում: Վերջին հաշվով` խնդիրը լուծվել է խաղաղապահ ուժերի մասնակցությամբ, և խաղաղապահ ուժերն ունեն հենց խաղաղապահ առաքելությունը` նման լարվածությունները չեզոքացնելու: Այնպես պետք է անել, որ մենք էլ այդ ժամանակահատվածը ճիշտ օգտագործենք, որպեսզի մեր անվտանգային միջավայրը վերականգնի իր ուժը և բովանդակությունը»:

Ի պատասխան մեկ այլ լրագրողի հարցի, թե ինչպես են ադրբեջանցիները կարողացել հասնել հանքավայր, Անդրանիկ Քոչարյանն ասել է, որ այստեղ փոխհամաձայնեցված գործողություններ են տեղի ունեցել, և դա շատ ճիշտ է: Թե ում միջև են տեղի ունեցել փոխհամաձայնություններ, Անդրանիկ Քոչարյանը չի մանրամասնել` նշելով. «Չէին կարող «բնապահպանները» վերցնեին դրոշակները և գնային Արցախի ցանկացած միջավայր հասնեին: Դա նշանակում է, որ ինչ-որ համաձայնություն է եղել, որպեսզի նման լարվածությունները չկրկնվեն: Ադրբեջանը պետք է գիտակցի, որ ուժային ճանապարհի հեռանկարը, ըստ էության, նաև հակազդման հնարավորություն է ստեղծում նման խնդիրները կարգավորելու համար»:

Պատգամավորի խոսքով Արցախի իշխանությունը պետք է միշտ կարողանա ռիսկերը կառավարել և կառավարում է: Ադրբեջանը միշտ էլ ունի ավելի մեծ ծրագրեր: Նա պետք է մի բան իմանա, որ նման քայլերով ստիպում է, որպեսզի Հայաստանը և Արցախն իրենց անվտանգային միջավայրը դարձնեն շատ ավելի գերակա:

Անդրադառնալով 2020 թվականի սեպտեմբերի 27-ին սանձազերծված ռազմական գործողությունների հանգամանքների ուսումնասիրման նպատակով ԱԺ քննիչ հանձնաժողովի կատարած աշխատանքներին` Անդրանիկ Քոչարյանը նշել է, որ հանձնաժողովի կողմից իրականացվող աշխատանքները խիստ գաղտնի են: Կատարված աշխատանքների հիման վրա հանձնաժողովի նախագահը զրուցել է Գլխավոր դատախազի հետ, որոշ դրվագների հետ կապված նյութեր կուղարկվեն Գլխավոր դատախազություն՝ ուսումնասիրելու համար:

Թե ում են պատրաստվում առաջիկայում հրավիրել հանձնաժողովի նիստին` հարցեր տալու համար, Անդրանիկ Քոչարյանը պատասխանել է. «Եթե շատ մտածեք, բոլորիդ համար ակնհայտ կլինեն հրավիրյալները: Բայց խնդիր կա: Առաջին հրավերները վերաբերում էին արտաքին բլոկին` Վարդան Օսկանյան, Ժիրայր Լիպարիտյան: Ժիրայր Լիպարիտյանը զանգահարել և ասել է, որ պատրաստ է: Վարդան Օսկանյանը հեռավար ասել է, որ պատրաստ չէ: Մովսես Հակոբյանն էլ ինչ-որ հայտարարություններ է արել»,- նշել է Անդրանիկ Քոչարյանը: Նա տեղեկացրել է, որ մշակվում է օրենսդրական նախաձեռնություն և հունվար ամսին կդրվի շրջանառության մեջ, ըստ որի՝ «Ազգային ժողովի կանոնակարգ» սահմանադրական օրենքում կնախատեսվեն խստացումներ հրավիրյալների չներկայանալու դեպքում:

«Ուսումնասիրվել են տասնյակ հազարավոր նյութեր, ինչը բավարար է, որ հանձնաժողովի նախագահը գրավոր նյութեր ուղարկի Գլխավոր դատախազություն: Վերջնահաշվարկում 44-օրյա պատերազմի արդյունքը ինչ-որ թերացումների արդյունք է, մեղմ ասած թերացումների»,- նշել է Անդրանիկ Քոչարյանը:

«Քննիչ հանձնաժողովի արձանագրումներն, առհասարակ, լավ հիմք են այս պահին տեղի ունեցող փոփոխությունների համար, քանի որ հստակ արձանագրված են մի շարք բացթողումներ, որոնք տարիներ ի վեր եղել են բանակում և հանգեցրել են կոնկրետ հետևանքների»,- հավելել է  «Քաղաքացիական պայմանագիր» խմբակցության քարտուղար Արթուր Հովհաննիսյանը: Ըստ նրա` Գլխավոր դատախազի փոփոխությունից հետո բավականին գործընթացներ են տեղի ունենում Դատախազությունում, և առաջիկայում կոնկրետ զարգացումներ կլինեն կոնկրետ անձերի վերաբերյալ: Հետևաբար, նա առաջարկել է սպասել իրադարձությունների հետագա զարգացումներին:

Անդրանիկ Քոչարյանը տեղեկացրել է, որ ընդդիմությունը Քննիչ հանձնաժողովի աշխատանքներին չի մասնակցում` հավելելով, որ Պաշտպանության և անվտանգության հարցերի մշտական հանձնաժողովի աշխատանքների որոշ դրվագներին մասնակցում են, բայց ոչ բոլորը: «Անվտանգությունն այն ոլորտն է, որտեղ մենք բոլորս միասին պետք է բավականին մեծ արագությամբ և որակյալ ոչ միայն օրենսդրական, այլ նաև գործնական ներդրում ունենանք մեր բանակաշինության գործում»,- նշել է Անդրանիկ Քոչարյանը:

Հանձնաժողովի նախագահի խոսքով Կառավարությունը հանդես է եկել ծավալուն օրենսդրական նախաձեռնություններով, որոնք վերաբերում են պաշտպանության ոլորտին, անվտանգային միջավայրի կատարելագործմանը, Ներքին գործերի նախարարության ձևավորմանը, պարեկապահակային ծառայությանը: Օրենսդրական նախաձեռնությունները մինչև նոր տարի ընդունված կլինեն: Իսկ բանակին վերաբերող փաթեթը կիրառման բուռն փուլում է գտնվում: