Ադրբեջանն ու Թուրքիան ակտիվացրել են «միջանցքի» պարտադրմանը միտված քայլերը
Տարածաշրջանային փորձագետ Արմեն Պետրոսյանը գրել է․
«Բաքվի վարչակարգի կողմից դեկտեմբերի 3-ին Գորիս-Ստեփանակերտ ճանապարհի արգելափակման սադրանքը, Ադրբեջան-Իրան սահմանին մեկնարկած թուրք-ադրբեջանական զորավարժությունները, Ադրբեջան-Ռուսաստան բարձր մակարդակի ակտիվ բանակցությունները պետք է դիտարկել մեկ ընդհանուր հարթությունում։
Այն ուղիղ կերպով վերաբերվում է «Զանգեզուրի միջանցք» ադրբեջանաթուրքական ծրագրի իրականացմանը և դրա հետ կապված «խոչընդոտների» հարթմանը։
Ընդ որում, «միջանցքի ծրագրի» հետ առնչվող դերակատարներից յուրաքանչյուրին թյուրքերը համապատասխան ուղերձ են հղում.
- Հայկական կողմերին՝ Լաչինի միջանցքի փակման և Արցախի շրջափակման սպառնալիք։
- Իրանին՝ համաթյուրքական ծրագրերի իրականացմանը խոչընդոտելու դեպքում թուրք-ադրբեջանական համատեղ պատասխան։
- Ռուսաստանին՝ «միջանցքի» հայկական հատվածում Մոսկվայի կարևոր դերակատարում, բացի այդ՝ նաև Ռուսաստանի շահերից բխող բազմաշերտ համագործակցության տարբեր հնարավորություններ՝ հատկապես աշխարհաքաղաքական բարդ իրողությունների պայմաններում»։