Մենք պետք է տարանջատենք պառակտում ասվածը մարդու անձնական որոշումներից․ Արծվիկ Մինասյանը՝ մանդատը վայր դնելու մասին

Ո՛չ «Վերածնվող Հայաստանն» է իր տված գնահատականներն այս իշխանությունների նկատմամբ փոխել, ո՛չ ՀՅԴ-ը, ո՛չ էլ, առհասարակ, «Հայաստան» խմբակցությունը: Այս մասին, այսօր՝ նոյեմբերի 30-ին, ԱԺ-ում լրագրողների հետ զրույցում ասաց ԱԺ «Հայաստան» խմբակցության քարտուղար, ՀՅԴ անդամ Արծվիկ Մինասյանը՝ անդրադառնալով իրենց խմբակցության պատգամավորներին, որոնք վայր են դրել իրենց մանդատները:

«Մեր աշխատանքի ռազմավարությունը պետք է լինի աշխատանքը ժողովրդի հետ, ազգային ինստիտուտների հետ, որոնք մեր ազգի, պետականության ողնաշարն են եւ նրանց ակտիվ ներգրավումը Հայաստանին սպառնացող մարտահրավերների հաղթահարման»,- ասաց Մինասյանը: Նրա խոսքով՝ ունեցել են որոշակի արդյունքներ։

«Այո՛, մեզ դեռ չի հաջողվել այն հիմնական նպատակադրումները, որ դրել էինք մեր առաջ, իրականացնել, բայց արդյո՞ք որոշակի արդյունքներ մենք չունենք, սա, խնդրում եմ, չանտեսենք։ Մենք ունեցել ենք արդյունքներ. այս իշխանությունը չի կարողացել իրականացնել թուրք-ադրբեջանական ծրագրերը»,- ասաց Մինասյանը։

Դիտարկմանը, որ գուցե մանդատը վայր դրած պատգամավորներն արագ իշխանափոխության ակնկալիք ունեին, որոնք չիրականացան եւ նրանք որոշեցին հեռանալ, Արծվիկ Մինասյանն ասաց. «Ցանկացած պայքար իր մեջ ակնկալիքներ է պարունակում՝ ժամանակի առումով, ստեղծվող արդյունքի տեսանելիության առումով: Հիմա պայքարը շարունակվում է: Այո, մարտավարական տեսակետից մեր գործընկերները կարող է համարում են, որ ԱԺ-ում պայքարն անիմաստ է, ԱԺ-ից դուրս պետք է պայքարեն: Մենք համարում ենք, որ բոլոր հարթակներում պետք է կարողանանք պայքարը տանել»:

Հարցին, թե հնարավո՞ր է, որ «Հայաստան» խմբակցությունում միայն ՀՅԴ-ականները մնան. «Ես լիահույս եմ, որ մեր պայքարող կազմը երբեք ու որևէ պայմաններում ճնշումներին չի ենթարկվելու»: Նրա խոսքով մանդատները դնելու հարց չի քննարկվում. «Դա ավելի շատ անձնական որոշում է: Վաղը չի բացառվում, որ կարող է ես էլ նման բան մտածեմ: Մենք պետք է տարանջատենք պառակտում ասվածը մարդու անձնական որոշումներից»:

Հիշեցնենք՝ «Վերածնվող Հայաստան» կուսակցությունը դադարեցնում է գործունեությունը ՀՀ Ազգային ժողովում։

Կուսակցության անդամ չորս պատգամավորներից երեքը՝ կուսակցության նախագահ Վահե Հակոբյանը, փոխնախագահներ Հռիփսիմե Ստամբուլյանն ու Ելենա Կիրակոսյանը, օրենքով սահմանված կարգով դիմում են ներկայացրել իրենց մանդատներից հրաժարվելու վերաբերյալ:

Զեմֆիրա Միրզոևան, որը ՀՀ 8-րդ գումարման Ազգային ժողովում ներկայացնում է Հայաստանի ասորական համայնքն ու խորհրդարան է անցել ՀՀ ԱԺ արտահերթ ընտրությունների «Հայաստան» դաշինքի համապետական ցուցակի երկրորդ մասով ազգային փոքրամասնությունների համար նախատեսված քվոտայով, կշարունակի պատգամավորական գործունեությունը՝ սեփական դիմումի համաձայն ժամանակավորապես սառեցնելով կուսակցությանն իր անդամությունը։

Ավելի վաղ «Հայաստան» խմբակցությունից մանդատնեը վայր էին դրել Արամ Վարդևանյանն ու Արթուր Ղազինյանը։