ԳՇ շտաբի պետի նախկին տեղակալ Ստեփան Գալստյանին ՔԿՀ-ից տեղափոխել են հիվանդանոց
ՀՀ զինված ուժերի գլխավոր շտաբի պետի նախկին տեղակալ Ստեփան Գալստյանը, որը գտնվում էր Երևանի «Կենտրոն» քրեակատարողական հիմնարկում, տեղափոխվել է «Էրեբունի» բժշկական կենտրոն։ Տեղեկությունը հայտնել է նրա պաշտպան Անդրանիկ Մանուկյանը՝ նշելով, որ Ստեփան Գալստյանը բժիշկների հսկողության տակ է. «Ստացիոնար բուժում է ստանում։ Չեմ կարող ասել, թե ինչ խնդիր ունի, դա բժշկական գաղտնիք է։ Ներկա պահին իրեն վատ է զգում, իր վիճակն այդքան լավ վիճակում չէ»։
Ստեփան Գալստյանի խափանման միջոցի փոփոխման հարցով պաշտպանը պատրաստվում է դիմել դատարան՝ արտահերթ նիստ անցկացնելու համար։
Հիշեցնենք, որ Երևանի ընդհանուր իրավասության դատարանը՝ նախագահությամբ դատավոր Կարեն Ֆարխոյանի, նախորդ տարվա հոկտեմբերի 2-ին Գլխավոր շտաբի պետի տեղակալ Ստեփան Գալստյանին կալանավորելու մասին որոշում էր կայացրել։ Գալստյանը կալանավորվել է ՀՀ ԶՈՒ-երի կարիքների համար ռազմամթերքի մատակարարման գործընթացում չարաշահումներ և առանձնապես խոշոր չափերով հափշտակություններ կատարելու դեպքերի առթիվ քննվող քրեական գործով։
Այս գործով ամբաստանյալի կարգավիճակում են ՊՆ նախկին նախարար Դավիթ Տոնոյանը, Ռազմական ավիացիայի նախկին պետ Ավետիք Մուրադյանը, զենքի մատակարարմամբ զբաղվող Դավիթ Գալստյանը (Պատրոն Դավիթը), ՀՀ ԶՈՒ ԳՇ նախկին պետ Արտակ Դավթյանը և այլ բարձրաստիճան զինվորականներ։
