ՄԱԿ-ի Գլխավոր ասամբլեան ընդունել է Ուկրաինային հասցված վնասի փոխհատուցման մասին բանաձևի նախագիծը
ՄԱԿ-ի Գլխավոր ասամբլեան այսօր հավանություն է տվել Ռուսաստանի ագրեսիայի հետևանքով Ուկրաինային հասցված վնասի փոխհատուցման մեխանիզմ սահմանելու մասին բանաձևին։
Փաստաթղթի օգտին քվեարկել է 94 պետություն, 14-ը դեմ են քվեարկել, իսկ 73 երկիր ձեռնպահ է մնացել: 11 երկիր ընդհանրապես չի մասնակցել քվեարկության։
Ասամբլեայի հրապարակած աղյուսակում երևում է, որ բանաձևին դեմ են քվեարկել Բելառուսը, Կենտրոնական Աֆրիկայի Հանրապետությունը, Չինաստանը, Կուբան, ԿԺԴՀ-ն, Էրիթրեան, Եթովպիան, Իրանը, Մալին, Ռուսաստանը, Սիրիան և Զիմբաբվեն:
Ձեռնպահ մնացած երկների շարքում են Հայաստանը, Ղազախստանը, Ղրղզստանը, Տաջիկստանը, Ուզբեկստանն ու Սերբիան։
Վրաստանը և Թուրքիան կողմ են քվեարկել, իսկ Ադրբեջանը չի մասնակցել քվեարկությանը։
ՄԱԿ-ի Գլխավոր ասամբլեայի արտահերթ նիստը տեղի է ունեցել Կանադայի, Գվատեմալայի, Նիդեռլանդների և Ուկրաինայի նախաձեռնությամբ։
Համաձայն ՄԱԿ-ի Գլխավոր ասամբլեայի կողմից քննարկման ներկայացված բանաձևի՝ այն «առաջարկում է իր անդամներին՝ Ուկրաինայի հետ համագործակցելով, ստեղծել վնասների միջազգային ռեգիստր, որը կծառայի որպես պահանջվող վնասի, կորուստների և վնասվածքների փաստագրված ապացույց, որոնք առաջացել են Ուկրաինայում կամ նրա դեմ Ռուսաստանի Դաշնության միջազգայնորեն անօրինական գործողությունների արդյունքում, ինչպես նաև ռեգիստրը խթանում և համակարգում է տվյալների հավաքագրումը»:
Ռուսաստանը դեմ է արտահայտվել փաստաթղթի ընդունմանը, նշելով, որ բանաձևի նախագիծը «չի դիմանում իրավական քննադատությանը» և «աննշան փորձ է օրինականացնելու այն, ինչ օրինականացված չէ միջազգային իրավունքի տեսանկյունից»։ Ռուսաստանի մշտական ներկայացուցիչ Վասիլի Նեբենզյան հանդիպման ժամանակ ասել է, որ արևմտյան երկրները ձգտում են օգտագործել Ռուսաստանի Դաշնության սուվերեն միջոցները, որոնք արգելափակել են՝ շարունակելու մատակարարումները և վճարել Կիևին արդեն իսկ տրամադրված զենքի համար, և այս հնարավորությունն անվանել է «բացահայտ թալան»: