Փաշինյանը հանձնում է Ղարաբաղը, որպեսզի Հայաստանը տանի դեպի Արևմուտք. «Կոմսոմոլսկայա պրավդա»

Ինչպես երևում է՝ Վաշինգտոնը Մոսկվայի թիկունքում համոզել է Երևանին կապիտուլյացիայի պայմանագիր ստորագրել և հրաժարվել Արցախից։ Գրել է «Կոմսոմոլսկայա պրավդան»։

Այն, որ Վաշինգտոնը և Բրյուսելը փորձելու են օգտագործել բարդ իրավիճակը և խնդիրներ ստեղծել Մոսկվայի համար նախկին Միության ամբողջ տարածքում, պարզ էր Ուկրաինայում հատուկ ռազմական գործողության  հենց սկզբից։

Այս առումով թերևս,  ամենահարմարը ղարաբաղյան խնդիրն է։ 2020 թ. 44-օրյա պատերազմից (պատերազմը դադարել է բացառապես Պուտինի միջնորդական ջանքերի շնորհիվ) և ռուսական խաղաղապահ զորակազմի տեղակայումից հետո Ղարաբաղում, թեկուզ փխրուն, բայց խաղաղություն է տիրել։ Փոխհրաձգությունները և տարբեր մասշտաբի միջադեպերը, որոնք տեղի էին ունենում Ադրբեջանի և Հայաստանի սահմանին, ակնհայտորեն ընթանում են քաղաքական ճնշման տրամաբանությունում՝ բանակցություններում արդյունքների հասնելու համար։ Բայց, դատելով ըստ ամենայնի, արդեն տեսանելի ապագայում վաղեմի հակամարտության պատմության մեջ նոր շրջադարձ է նշմարվում։

Հոկտեմբերի 10-ին ռուսական թելեգրամ-ալիքներից մեկում հրապարակվել է հայ-ադրբեջանական կարգավորման վերաբերյալ այսպես կոչված վաշինգտոնյան փաստաթուղթը։ Փաստաթուղթը արևմտյան միջնորդական առաքելության արդյունքն է և, համաձայն տարբեր աղբյուրների, բրյուսելյան և փարիզյան բանակցություններից, ինչպես նաև Վաշինգտոնում արտաքին գործերի նախարարների և Անվտանգության խորհուրդների քարտուղարների հանդիպումից հետո համարվել է ընդունելի թե՛ Ալիևի, թե՛ Փաշինյանի կողմից։

Դատելով  փաստաթղթի բովանդակությունից՝ դրա ստորագրման դեպքում կիրականացվեն միջպետական սահմանների վերջնական սահմանազատման աշխատանքներ, կսկսվեն այսպես կոչված զանգեզուրյան միջանցքի (արագընթաց մայրուղի, որը պետք է արևելյան Ադրբեջանի շրջանները Հայաստանի տարածքով կապի Նախիջևանի հետ) շինարարության աշխատանքները։

Բացի այդ, Ադրբեջանը պետք է նշանակի մի ինչ-որ «պաշտոնական ներկայացուցչի», որը Ղարաբաղի հայերի նմանատիպ ներկայացուցչի հետ պետք է քննարկի և լուծի նարնց անվտանգության և իրավունքների հարցերը։ Որևէ կարգավիճակ Ղարաբաղի հայերի, առավել ևս՝ չճանաչված ԼՂՀ-ի համար նախատեսված չէ։

Հետաքրքիր է, որ այս փաստաթղթի հրապարակումն առայժմ բողոքի շարժման ոչ մի բռնկում ոչ Հայաստանում, ոչ Ղարաբաղում չի առաջացրել։ Չէ՞ որ հասկանալի է, որ իրականում դա նշանակում է Լեռնային Ղարաբաղի լիակատար անցում ադրբեջանական իրավասության ներքո, իսկ որևէ «պաշտոնական ներկայացուցչի» ձևական լինելն ադրբեջանցիները չեն էլ թաքցնում. դեռևս բոլորովին վերջերս Իլհամ Ալիևը նորից հայտարարել է, թե Ղարաբաղում ապրող հայերը Ադրբեջանի քաղաքացիներ են, և նրանց հետ վարվելու են այդ երկրի Սահմանադրությանը համապատասխան։ Հասկանալի է, որ շուտով Ղարաբաղում ոչ մի հայ չի մնա։

Եթե գործող հայկական իշխանությունը համաձայնի ընդունել այս փաստաթուղթը (մեր աղբյուրները Հայաստանի կառավարությունում հավաստիացնում են, որ Փաշինյանը վստահ է դրա շուտափույթ ստորագրման անհրաժեշտության մեջ), ապա այն կդառնա Անդրկովկասում տեկտոնական տեղաշարժի կատալիզատոր։ Ադրբեջանի և Թուրքիայի հետ հաշտություն ստորագրող Հայաստանին, որը կկորցնի Ղարաբաղը և, իբր, դրանով իսկ կազատվի գոյաբանական սպառնալիքներից, պետք չեն լինի ոչ ռուսական ռազմակայանը Գյումրիում, ոչ ռուս խաղաղապահները Ղարաբաղում։ Ավելի քան հասկանալի է, որ հենց սա էլ արևմտյան միջնորդների իսկական նպատակն է։

Փաշինյանը կդիմի՞ այդ քայլին։ Հայաստանի և Ռուսաստանի փորձագիտական հանրույթի մեծ մասի կարծիքով՝ նա դա կանի օպերատիվ կերպով և առանց խղճի խայթի. մինչև իշխանության գալը նա հանդես էր գալիս որպես համոզված արևմտամետ և ԵԱՏՄ-ից Հայաստանը դուրս բերելու կողմնակից։ Արդյոք՞ դա հուզումներ կառաջացնի Հայաստանում և Ղարաբաղում։ Ամենայն հավանականությամբ՝ այո։ 2021թ. ընտրություններում Փաշինյանն իր իշխանությունը պահեց արդարացի աշխարհի, Ղարաբաղը հայկական պահելու և ՌԴ-ի հետ ռազմավարական դաշինքն ամրապնդելու կարգախոսներով։ Հայ ընտրողը, որի համբերությունը և հանդուրժողականությունը Փաշինյանի անհաջողությունների հանդեպ անսահման են թվում, նրան այդպիսի մանդատ չի տվել և կարող է հիշեցնել վարչապետին բոլոր փորձանքները, որոնք տեղի են ունեցել անցած չորս տարիներին։

Բացի այդ, հազիվ թե հայերը մոռացած լինեն նորագույն պատմության դասերը և հաստատ հիշում են, թե ինչ կարող է պատահել, երբ մենակ ես մնում՝ անվտանգության չլուծված խնդիրներով՝ Վաշինգտոնի «ազնիվ խոսքի» ներքո։