ԵՄ-ը համաձայնել է Եվրոպայում ուկրաինացի զինվորականներին պատրաստելու առաքելություն ստեղծել
Եվրամիությունը համաձայնություն է տվել եվրոպական երկրների տարածքում Ուկրաինայի զինված ուժերի զինվորներին պատրաստելու առաքելության ստեղծմանը, հայտնում է Agence France-Presse-ը՝ վկայակոչելով դիվանագիտական աղբյուրները և փաստաթղթի նախագիծը։
ԵՄ երկրների մշտական ներկայացուցիչները պայմանավորվել են առաքելություն հիմնել Բրյուսելում։ Վերջնական փաստաթուղթը կհաստատվի հոկտեմբերի 17-ին՝ Լյուքսեմբուրգում կայանալիք ԵՄ ԱԳ նախարարների հանդիպման ժամանակ, նշում է գործակալությունը։
AFP-ի աղբյուրների համաձայն՝ նախնական փուլում 15 000 զինվորականների համար կկազմակերպվի ուսուցում։
Համաձայնագրի շրջանակներում առաքելության յուրաքանչյուր ընդունող երկրում կստեղծվեն շտաբներ և ուսումնական կենտրոններ: Լեհաստանն ու Գերմանիան արդեն պատրաստակամություն են հայտնել իրականացնել նման գործառույթներ։ Առաքելությունը կֆինանսավորի Խաղաղության եվրոպական հիմնադրամը (ԵՀՀ), հայտնում է գործակալությունը։
Ավելի վաղ առաքելության ստեղծման մասին հայտարարություն էր արել ԵՄ դիվանագիտության ղեկավար Ժոսեպ Բորելը։ Նա նաև հայտնել է միության պատրաստակամությունը՝ դիվանագիտական ճանապարհով ձգտելու Ուկրաինայի հակամարտության կարգավորմանը։
ՌԴ ԱԳՆ-ն նշել է, որ Կիևին ռազմական օգնության առաքելության ստեղծումը Եվրոպային կդարձնի հակամարտության մասնակից։