Խաղաղ բնակչության դեմ հանցագործությունների և բռնությունների մասին մտահոգիչ հաղորդումներ են ստացվում․ Տոյվո Կլաարը ամփոփել է Երևան և Բաքու կատարած այցերը

Վերջին ռազմական գործողությունների ընթացքում խաղաղ բնակչության նկատմամբ հանցագործությունների և բռնությունների մասին մտահոգիչ հաղորդումներ են ստացվում։ Այս մասին Twitter-ի իր միկրոբլոգում գրել է Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարը։

Նա նշել է, որ անցյալի դեպքերը ևս քննարկում են պահանջում, բայց ոչ մի դեպքում դրանք չեն կարող արդարացում դառնալ։ «Մարդու իրավունքների խախտման և ռազմական հանցագործությունների մասին բոլոր մեղադրանքները պետք է հետաքննվեն, իսկ մեղավորները` պատասխանատվության ենթարկվեն»,- գրել է նա։

ԵՄ հատուկ ներկայացուցիչը նաև հայտնել է Բաքվում, Երևանում և Վիեննայում հրատապ հանդիպումներից հետո Բրյուսել վերադառնալու մասին։

«Մենք շարունակում ենք աշխատել ամենաբարձր մակարդակով, և մեր նպատակն է մնում օգնել Հայաստանին և Ադրբեջանին համապարփակ և կայուն համաձայնության հասնել, որը կապահովի Հարավային Կովկասի կայունությունը, անվտանգությունը և բարգավաճումը»,-գրել է նա՝ ընդգծելով, որ շատ խնդիրներ կան, բայց հույս կա, որ հրադադարը շարունակական կլինի։

«Պետք է վերադառնալ բանակցություններին»,- գրել է Կլաարը։