Գիշիում պատերազմում նահատակված հերոսներին նվիրված հուշակոթող է կանգնեցվել
Նախօրեին Մարտունու շրջանի Գիշի համայնքի դպրոցի բակում տեղի է ունեցել Արցախյան 44-օրյա պատերազմում նահատակված հերոսներին նվիրված հուշակոթողի բացման արարողություն: «Արցախպրես»-ի հետ զրույցում Գիշի համայնքի ղեկավար Սերոբ Աղաբեկյանը տեղեկացրել է, որ հուշակոթողը հեղինակել է հայաստանաբնակ քանդակագործ Վաղինակ Մանուկյանը:
Համայնքի ղեկավարի խոսքով, պատերազմի ընթացքում Գիշու միջնակարգ դպրոցի շենքում տեղակայված է եղել Մարտունու զինվորական հոսպիտալը, որտեղ վիրավոր զինվորների կյանքերի համար պայքարում էին նաև Երևանի տարբեր կլինիկաներից ժամանած բժիշկներ։ Արցախյան 44-օրյա պատերազմում անմահացած հերոսների հուշակոթողի նախաձեռնությունը՝ հոսպիտալի բժիշկներինն է:
«Դպրոցի բակում կանգնեցված հուշակոթողը նաև իր ազդեցությունը կունենա մատաղ սերնդի ռազմահայրենասիրական դաստիարակության գործում: Երեխաները տեսնելով հանուն հայրենիքի իրենց կյանքը զոհաբերած տղաների հիշատակը հավերժացնող կոթողը՝ սերտելու են հերոսական դասերն ու դաստիարակվելու են Նրանց խիզախության ու հայրենանվիրումի օրինակներով»,-ասել է համայնքապետը: