Արևմուտքը չի կարողանում մեկուսացնել Ռուսաստանին. «Ֆինանսյալ թայմս»
Ռուսաստանին մեկուսացնելու Արևմուտքի ջանքերը ձախողվում են, ասվում է բրիտանական Financial Times թերթի մեկնաբան Էդվարդ Լյուսի հոդվածում:
«Արևմուտքին չի հաջողվում մեկուսացնել Ռուսաստանին» վերնագրով հոդվածի հեղինակն ընդգծում է, որ Ուկրաինայում Ռուսաստանի հատուկ ռազմական գործողությունը «բարձրացնում է բազմաբևեռ աշխարհի պահանջարկը»։ Նրա խոսքով, ոչարևմտյան աշխարհի մեծ մասը «փափագում է ռազմավարական ինքնավարության»:
«Մենք չենք կարող մեղադրել այնպիսի երկրներին, ինչպիսիք են Հնդկաստանը և Բրազիլիան, որ նրանք ռուսական նավթը զեղչով են գնում: Պետք չէ նաև զարմանալ, որ ռուսական հացահատիկ գնել ցանկացողները բավականին են»,- գրում է Լյուսը:
Մեկնաբանը նշում է, որ Հնդկաստանն ու Չինաստանն օգնում են ստեղծել ռուսական ապրանքների փոխադրման այլընտրանքային վճարային համակարգեր և ռուսական ապրանքների փոխադրման երթուղիներ ու չեզոքացնում են բազմակողմ համակարգից Ռուսաստանին բացառելու Արևմուտքի ջանքերը։
«Եթե ուզում ենք, որ մյուս երկրները մեզ հետևեն ընդդեմ Ռուսաստանի, պետք է ուշադրություն դարձնենք, թե ինչ են նրանք ուզում: Անընդհատ ինքներս մեզ կրկնելով, թե մենք խավարի դեմ լույսի պատերազմի մեջ ենք, որում ոսկե միջին չկա, դիվանագիտական ռազմավարություն չէ», – կարծում է Լյուսը: