Ուկրաինան, Վրաստանը և Մոլդովան ԵՄ-ի թեկնածուների կարգավիճակ կստանան մի շարք պայմաններով

Եվրահանձնաժողովը (ԵՀ) այսօր՝ հունիսի 17-ին, նախատեսում է առաջարկել Ուկրաինային, Վրաստանին և Մոլդովային ԵՄ-ին անդամակցելու թեկնածու երկրների կարգավիճակ տրամադրել: Այդ մասին հայտնում է Bloomberg-ը՝ հղում անելով իր աղբյուրներին։ Վերջիններիս խոսքով՝ այս որոշումը կկայացվի, երբ երկրները կատարեն մի շարք պայմաններ։

Գործակալության տվյալներով՝ Եվրահանձնաժողովը պետք է Ուկրաինային և Մոլդովային պայմաններ հայտարարի՝ օրենքի գերակայության, արդարադատության և կոռուպցիայի դեմ պայքարի վերաբերյալ։ Ակնկալվում է, որ հանձնաժողովը նաև խորհուրդ կտա Վրաստանին տրամադրել ԵՄ թեկնածուի կարգավիճակ, բայց նաև մի շարք պայմաններով, թե ինչի հետ են դրանք առնչվելու, չի նշվում։

Bloomberg-ի փոխանցմամբ, Ուկրաինան ԵՄ-ին անդամակցելու հայտ է ներկայացրել ռուսական ռազմական գործողության ֆոնին: Դանիան և Նիդեռլանդները դեմ են արտահայտվել ԵՄ-ին երկրի անդամակցությանը։ ԵՄ-ը հայտարարել է, որ Ուկրաինայի անդամակցության մասին որոշումը կկայացվի երկրում ռազմական գործողությունների ավարտից հետո։ Հայտեր են ուղարկել նաև Վրաստանն ու Մոլդովան։