Հայաստանում դիմորդները ընդունելության երկու քննություն կհանձնեն. Կարո Նասիբյան
Պետական միասնական քննության շրջանակներում բուհերի ընդունելության քննությունները բաղկացած են լինելու երկու առարկայից: Այս մասին մայիսի 19-ին լրագրողների հետ հանդիպմանն ասաց Գնահատման և թեստավորման կենտրոնի փոխտնօրեն Կարո Նասիբյանը։
Նա պարզաբանեց, որ տարբեր մասնագիտությունների մասով դիմորդները կարող են մեկ քննություն հանձնել. «Գործընթացն իրականացվում է երկու փուլով՝ հունվար և հունիս-հուլիս ամիսներին։ Առաջին փուլում դիմորդը նշում է մասնագիտությունը։ Մրցույթն անցկացվում է առկա միավորների հիման վրա»,- ասաց Նասիբյանը։
Պաշտոնյան հավելեց, որ երկրորդ փուլում առաջին փուլ չանցած դիմորդները կկարողանան դիմել վեց մասնագիտությունների գծով և հավակնել տեղին արդեն հանձնված առարկաներից քննությունների արդյունքների հիման վրա։ Երկրորդ փուլում դիմորդները կարող են դիմել առաջին փուլից հետո մնացած թափուր տեղերի համար:
«Օտարերկրյա ուսումնական հաստատություններ ավարտած դիմորդները, ում ատեստատում «Հայոց լեզու» առարկայից գնահատական չկա, ինչպես նաև այս ամառ զորացրված դիմորդները քննություն կհանձնեն հուլիսին։ Մնացած բոլորը կհանձնեն հունիսին։ Եթե նախկինում հունիսին հնարավոր էր քննություն չհանձնել և հանձնել հուլիսին, ապա նոր ընթացակարգով դա հնարավոր չի լինի։ Քննությունների հունիսյան փուլը կանցկացվի հունիսի 7-ից հունիսի 24-ը, իսկ հուլիսյան փուլը՝ հուլիսի 2-ից 8-ը։ Քննությունների արդյունքները կհրապարակվեն հուլիսի 18-ին։ Ավելի ուշ կհրապարակվի նաև թափուր տեղերի ցանկը»,- ընդգծեց նա։
