Ֆինլանդիան Ռուսաստանի կողմից ռազմական սպառնալիքներ չի տեսնում
Ֆինլանդիան ուղղակի ռազմական սպառնալիք չի տեսնում Ռուսաստանի կողմից, CNN-ին ասել է ՆԱՏՕ-ում հանրապետության մշտական ներկայացուցիչ Կլաուս Կորհոնենը։
Նրա խոսքով՝ Հելսինկին ռուսական կողմից ոչ ստանդարտ գործունեություն չի նկատում։
«Առայսօր Ռուսաստանի կողմից Ֆինլանդիայի համար ուղղակի ռազմական սպառնալիքներ չկան»,- ընդգծել է Կորհոնենը։
Դիվանագետը նշել է, որ Ֆինլանդիայի սահմանը լիովին անվտանգ է՝ հավելելով, թե «մենք շատ հեռու ենք ցանկացած տեսակի միջուկային իրավիճակից»։ Այնուամենայնիվ, նա կարծում է, որ Ուկրաինայի ապառազմականացման հատուկ գործողությունը հանգեցրել է կտրուկ փոփոխությունների անվտանգության ոլորտում, ուստի Հելսինկին պատրաստվում է ինտեգրվել Հյուսիսատլանտյան դաշինքին։
Շվեդիան և Ֆինլանդիան սկսեցին խոսել իրենց երկարաժամկետ չեզոքությունից հրաժարվելու և ՆԱՏՕ-ին անդամակցելու հնարավորության մասին՝ Ուկրաինայում ռուսական հատուկ գործողության ֆոնին։ Կազմակերպության գլխավոր քարտուղար Յենս Ստոլտենբերգը պաշտպանել է այս գաղափարը և խոստացել է ապահովել երկու երկրների արագ մուտքը:
Կրեմլը Շվեդիայի և Ֆինլանդիայի անդամակցությունը դաշինքին համարել է էկզիստենցիալ սպառնալիք երկրի համար։ Իսկ Անվտանգության խորհրդի փոխնախագահ Դմիտրի Մեդվեդևը հայտարարել է դաշինքի ագրեսիվ գործողություններին պատրաստ լինելու անհրաժեշտության մասին՝ ռուսական սահմանների մոտ իր ներկայությունն ընդլայնելու փորձերի ֆոնին։