Այսօր արդեն ապացուցված է․ երկրի վարչապետը ստախոս է․ Ջուլֆալակյան

Սիրելի՛ հայրենակիցներ, մեզ բոլորիս խաբել են․ խաբել են Արցախի հարցում, խաբել են տարածքային ամբողջականության պահպանման հարցում, թռիչքաձև տնտեսություն ապահովելու հարցում, առողջապահության և նույնսիկ իրենց այդքան սիրած ասֆալտի թեմայում։ Այս մասին Ֆրանսիայի հրապարակում ասաց ըմբշամարտիկ, ԱԺ նախկին պատգամավոր Արսեն Ջուլֆալակյանը։

«Խաբել են ինձ անձամբ, երբ խնդրում էին ինձ միանալ իրենց և մասնակցել հզոր և ուժեղ, մեր երազանքների Հայաստանի ստեղծմանը։ Իրականում հայրենասեր մարդիկ նրանց համար միայն գեղեցիկ փաթեթավորում էին, իսկ ներքուստ նրանք վարում էին իրենց ազգակործան քաղաքականությունը։ Այսօր արդեն ապացուցված է․ երկրի վարչապետը ստախոս է։

Մեզ առաջարկում են հաշտության պայմանագրեր Ադրբեջանի ու Թուրքիայի հետ։ Բայց ինչի՞ դիմաց։ Մենք ունենք բիզնեսմեն պատգամավորներ, ավելի ճիշտ՝ օլիգարխներ, որոնք գումարներ են խոստանում, այսինքն, առաջարկում են վաճառվել։ Մոռացե՞լ ենք, թե երկու տարի առաջ պատերազմի ժամանակ ի՞նչ էին անում այդ երկու պետությունները։ Էլ չեմ խոսում Ցեղասպանության մասին։

Իմ 6 տարեկան երեխան այստեղ լսել է «Զարթնի՛ր, Լաո» երգը և զգացել բոլորիս միավորող հայրենասիրությունը։ Ինչպե՞ս կարող են մյուսները չզգալ դա, ինչպե՞ս կարող են անտարբեր նայել, ինչպես են մեր երկրի տարածքները փոքրանում, մեր շահերը վաճառում, ինչպես ենք օր օրի վրա կորցնում մեր արժանապատվությունը։

Միացե՛ք։ Սա մեկ անձին իշխանության բերելու խնդիր չէ, քաղաքական ուժի խնդիր չէ։ Ամպագոռգոռ հայտարարություններ արած քաղաքական ուժեր, եկե՛ք, բոլորդ միացե՛ք։ Եկեք միանանք ու հասնենք այս քաղաքական ուժի, ազգակործան վարչապետի իշխանազրկմանը։ Միայն դրանից հետո կարող ենք լինել արժանապատիվ և ստեղծել արժանապատիվ Հայաստան»,- ասել է Ջուլֆալակյանը։