Բաքվի բռնապետը կրկին սպառնացել է Հայաստանին
«Այս պահին երկու երկրների արտաքին գործերի նախարարները ձևավորում են աշխատանքային խմբեր, և կարծում եմ, առաջիկայում կսկսեն հստակ բանակցություններ։ Պետք չէ ձգձգել բանակցությունները։ Հենց հինգ սկզբունքների հիման վրա կստորագրվի խաղաղության պայմանագիր»,-այս մասին հայտարարել է Բաքվի բռնապետ Ալիևը օկուպացված հայկական Շուշիում։
Բռնապետի խոսքով, համաձայնագրի տեքստը կպատրաստվի ու կստորագրվի առաջիկայում, ինչից հետո Հայաստանի ու Ադրբեջանի միջև կստեղծվեն հարաբերություններ, այդ թվում դիվանագիտական։
«Այս առաջարկով մենք հերթական անգամ ցուցաբերում ենք բարեհաճություն և հեռատեսություն։ Հայաստանում գլուխ բարձրացնող ռևանշիստական ուժերը պետք է իմանան, որ սա Հայաստանի միակ ելքն է և գուցե վերջին հնարավորությունը։ Եթե հրաժարվեն, ուրեմն մենք չենք ճանաչի Հայաստանի տարածքային ամբողջականությունը և պաշտոնապես կհայտարարենք այդ մասին։ Հաշվի առնելով ղարաբաղյան երկրորդ պատերազմի արդյունքները՝ հայկական կողմը պետք է լավ հասկանա, թե ինչի կհանգեցնի այդ քայլը»,- ասել է նա։
