Քովիդ պատվաստանյութի ներմուծումների 76%-ը կատարվել են խախտումներով
Պարզվում է, որ 2021թ․ փետրվարից մինչև 2022թ․ մարտ ընկած ժամանակահատվածում ՀՀ է ներմուծվել 34 խմբաքանակ «Քովիդ պատվաստանյութ»՝ գործող օրենսդրության կոպիտ խախտումներով։ Այս մասին նշել է «Ազատ կամք» նախաձեռնությունը։ https://www.facebook.com/permalink.php?story_fbid=161616799603219&id=102598538838379
«Ըստ ՀՀ ԱՆ «Ակադեմիկոս Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոն» ՓԲԸ-ի փորձագիտական եզրակացությունների այդ խմբաքանակների 76% դեպքերում ներմուծման համար պահանջվող փաստաթղթերից առնվազն 1-ը, իսկ որոշ դեպքերում մինչև 5-ը առկա չեն եղել:
Տրամադրված փորձագիտական եզրակացությունների վերլուծությունը ցույց է տալիս, որ բացակայում են.
- Դեղերի բացթողնման հավաստագրերը՝ տրված իրավասու մարմնի կողմից (61,8% դեպքում)։
- Ամփոփ արձանագրությունները՝ տրված արտադրող կազմակերպության կողմից (47,1% դեպքում)։
- Դեղերի ներդիր թերթիկները (38,2% դեպքում)։
- Դեղի որակի հավաստագրերը (8,8% դեպքում)։
- Որակի հավաստագրում պիտանիության ժամկետի մասին տեղեկությունը (5,9% դեպքում)։
Իսկ ամենազավեշտալին այն է, որ ԱՆ-ն ներկրողից պահանջել է ներկայացնել բացակայող փաստաթղթերը էլեկտրոնային փոստի միջոցով, ի պատասխան ստանալով մատակարարի բացատրությունը՝ արտակարգ իրավիճակում դրանց տրամադրման դժվարությունների վերաբերյալ (տես կցված գրությունը (http://surl.li/btjnb))։
Այսպիսով, անտեսելով պահանջվող փաստաթղթերի առկայությունը, խախտելով ՀՀ կառավարության կողմից սահմանված կարգը, Առողջապահության նախարարությունը հղում կատարելով ԱՀԿ-ի կողմից արտակարգ իրավիճակներում այդ փորձնական պրեպարատների կիրառման թույլտվությանը, հրաման է տվել թույլատրել ներմուծել «պատվաստանյութերի» նշված խմբաքանակները:
Մյուս զավեշտը կայանում է նրանում, որ միայն մեր հարցումներից հետո է նախարարությունն անդրադառնում օրենսդրության խախտումներին և պոստ ֆակտում նախաձեռնում դրա մեջ փոփոխությունների և լրացումների կատարումը, որպեսզի ընդամենը լեգիտիմացնի առանց որակի հավաստագրերի, ներդիր թերթիկների և այլ պահանջվող փաստաթղթերի առկայության «պատվաստանյութերի» հաջորդ խմբաքանակների ներմուծումները:
Փաստորեն.
- Արտակարգ իրավիճակը խոչընդոտ է հանդիսացել էլեկտրոնային փոստով արտադրողից բացակայող փաստաթղթերը ստանալու համար։
- Առողջապահության նախարարության համար հիմք է հանդիսանում ո՛չ թե ՀՀ օրենսդրությունը, այլ ԱՀԿ-ի ցուցումները:
- Ի՞նչ է ներմուծվել ու ի՞նչ է ներարկվել ՀՀ բնակիչներին:
- Վերոնշյալ և բազում այլ հարցերի պատասխանները կպարզվեն հատուկ քննությունից հետո միայն»,- գրված է նախաձեռնության ֆեյսբուքյան էջում:
