Սաուդյան Արաբիան երես է թեքել ԱՄՆ-ից և միացել է Ռուսաստանին. Rai Al Youm
Սաուդյան Արաբիան որոշել է երես թեքել ԱՄՆ-ից և միանալ Ռուսաստանի ու Չինաստանի նոր դաշինքին, ենթադրել է սյունակագիր Խալիդ ալ-Ջաուսին բրիտանական Rai Al Youm թերթի հոդվածում:
Նրա կարծիքով՝ Պարսից ծոցի երկրների ղեկավարները սկսել են հասկանալ, որ ամերիկյան ազդեցությունն աշխարհում նվազում է, իսկ Մոսկվայի ու Պեկինի ազդեցությունը, ընդհակառակը, ավելանում է։
«Իբն Սալմանը կարող է որոշել երես թեքել Ամերիկայից, որը 80 տարի եղել է Սաուդյան Արաբիայի ռազմավարական դաշնակիցը և միանալ ռուս-չինական նոր դաշինքին, որն ազդարարում է արմատական փոփոխություն ոչ միայն Պարսից ծոցի տարածաշրջանում, այլև Մերձավոր Արևելքում»,- խոստովանել է Խալիդ ալ-Ջաուսին:
Հրապարակախոսը հիշեցրել է, որ Էր-Ռիադի և Վաշինգտոնի հարաբերությունները վատթարացել են նախագահ Ջո Բայդենի օրոք, ով խոսել է թագաժառանգ արքայազն Մուհամմեդ իբն Սալման Ալ Սաուդի հետ համագործակցել չցանկանալու մասին։ Մասնավորապես, նա մերժել է ամերիկյան առաջնորդի խնդրանքը՝ ավելացնել նավթի արդյունահանումը, որպեսզի գները նվազեն Ուկրաինայում ռազմական գործողության պատճառով Մոսկվայի նկատմամբ սահմանած արևմտյան պատժամիջոցների ֆոնին։
«Սաուդյան Արաբիան քաղաքական շրջադարձ կատարեց դեպի Չինաստան, երբ ԱՄՆ-ը հրաժարվեց նրանից, սկսեց մեղադրել նրան մարդու իրավունքների խախտման և լրագրող Ջամալ Խաշուկջիի սպանության մեջ», – կարծում է Rai Al Youm– հեղինակը։
